ന്യൂദല്‍ഹി: മൊബൈല്‍ ഫോണുകളുടെ നിര്‍മാണത്തിന് ഉപയോഗിക്കുന്ന ഘടകഭാഗങ്ങളുടെ ഇറക്കുമതി തീരുവ കുത്തനെ കുറച്ച് കേന്ദ്രം. 15ല്‍ നിന്ന് 10 ശതമാനമായാണ് നികുതി കുറച്ചിരിക്കുന്നത്. ഇതോടെ മൊബൈല്‍ ഫോണുകളുടെ വിലയില്‍ മൂന്ന് മുതല്‍ അഞ്ച് ശതമാനം വരെ കുറവുണ്ടാകും.
ആഗോള വിപണികളുമായി മത്സരിക്കുന്നതിന്റെ ഭാഗമായാണ് കേന്ദ്ര ധനകാര്യ മന്ത്രാലയത്തിന്റെ പുതിയ തീരുമാനം. ബാറ്ററിയുമായി ബന്ധപ്പെട്ട ഭാഗങ്ങള്‍, ലെന്‍സ്, പിന്‍ഭാഗത്തെ കവര്‍, പ്ലാസ്റ്റിക്, ലോഹം എന്നിവ ഉപയോഗിച്ച് നിര്‍മിച്ച വിവിധ പാര്‍ട്ടുകള്‍, സിം സോക്കറ്റുകള്‍ എന്നിവ ഉള്‍പ്പെടെയുള്ളവയുടെ തീരുവയാണ് കുറച്ചത്. ജനുവരി 30 മുതല്‍ ഇത് പ്രാബല്യത്തില്‍ വന്നതായാണ് റിപ്പോര്‍ട്ട്.
ഭാരതത്തില്‍ സ്മാര്‍ട്ട് ഫോണുകളുടെ ഉത്പാദന ചെലവ് കുറയ്‌ക്കുന്നതിനും ചൈന, വിയറ്റ്നാം എന്നിവിടങ്ങളില്‍നിന്നുള്ള മത്സരം നേരിടുന്നതിനും ഇറക്കുമതി തീരുവ കുറയ്‌ക്കണമെന്ന് കമ്പനികള്‍ നേരത്തെ ആവശ്യപ്പെട്ടിരുന്നു. രാജ്യത്തെ മൊബൈല്‍ ഫോണ്‍ ഉത്പാദകര്‍ക്ക് അനുകൂലമായ നീക്കമാണിത്. കൂടാതെ ഭാരതത്തിന്റെ കയറ്റുമതി സാധ്യത വര്‍ധിപ്പിക്കുകയും ചെയ്യും.
പ്രീമിയം മൊബൈല്‍ ഫോണുകളുടെ നിര്‍മാണത്തിന് ആവശ്യമായ ഭാഗങ്ങളുടെ ഇറക്കുമതി തീരുവ കുറയ്‌ക്കുന്നതില്‍ നേരത്തെ തന്നെ സര്‍ക്കാര്‍ തലത്തില്‍ ചര്‍ച്ചകള്‍ നടന്നിരുന്നു. ഉത്പാദനം കൂട്ടുകയെന്ന ലക്ഷ്യത്തോടെ കഴിഞ്ഞ ബജറ്റില്‍ പ്രീമിയം സെഗ്‌മെന്റിലെ ഫോണുകള്‍ക്ക് ഉപയോഗിക്കുന്ന പ്രത്യേക ഘടകങ്ങളുടെ 2.5 ശതമാനം കസ്റ്റംസ് തീരുവ ഒഴിവാക്കിയിരുന്നു.
