ന്യൂദൽഹി: ഭാരതത്തിന്റെ വിദേശകാര്യ സെക്രട്ടറി വിനയ് മോഹൻ ക്വാത്ര തിങ്കളാഴ്‌ച ഭൂട്ടാന്റെ പുതിയ പ്രധാനമന്ത്രി ഷെറിംഗ് ടോബ്‌ഗെയെ സന്ദർശിച്ചു. പീപ്പിൾസ് ഡെമോക്രാറ്റിക് പാർട്ടി (പിഡിപി) നേതാവ് ടോബ്‌ഗേയുടെ കീഴിൽ പുതിയ സർക്കാർ രൂപീകരിച്ചതിന് ശേഷം ഭാരതത്തിൽ നിന്നുള്ള ആദ്യത്തെ ഉന്നതതല സന്ദർശനത്തിലാണ് ക്വാത്ര മൂന്ന് ദിവസത്തെ യാത്രയ്‌ക്കായി നേരത്തെ ഇവിടെയെത്തിയത്.
ഗ്യലിയോങ് ത്ഷോഗ്ഖാങ്ങിലെ പ്രധാനമന്ത്രിയുടെ ഓഫീസിൽ ക്വത്ര പ്രധാനമന്ത്രി ടോബ്ഗയെ സന്ദർശിച്ചു. ഭൂട്ടാനും ഭാരതവും തമ്മിലുള്ള പരസ്പര താൽപ്പര്യവും സഹകരണവും സംബന്ധിച്ച വിവിധ മേഖലകൾ യോഗം ചർച്ച ചെയ്തതായി ഭൂട്ടാനീസ് പത്രം റിപ്പോർട്ട് ചെയ്യുന്നു. കൂടാതെ ഹിമാലയൻ രാഷ്‌ട്രവുമായുള്ള ഇന്ത്യയുടെ ബന്ധം കൂടുതൽ വർധിപ്പിക്കുന്നതിന് പരസ്പര താൽപ്പര്യമുള്ള മേഖലകളും ബഹുമുഖ സഹകരണവും രൂപപ്പെടുന്നതിന്റെ പ്രാധാന്യത്തെക്കുറിച്ചും ചർച്ചകൾ നടന്നു.
ഇതിനു പുറമെ ഭൂട്ടാൻ വിദേശകാര്യ സെക്രട്ടറി ഓം പെമ ചോഡനുമായി ക്വാത്ര ഉഭയകക്ഷി കൂടിയാലോചനകളും നടത്തി. വികസന പങ്കാളിത്തം, ബഹിരാകാശം, ഊർജം, വ്യാപാരം, സാങ്കേതികവിദ്യ, സാമ്പത്തിക ബന്ധങ്ങൾ, ജനങ്ങൾ തമ്മിലുള്ള ബന്ധം എന്നിവയിൽ ഭാരതവും ഭൂട്ടാനും തമ്മിലുള്ള സഹകരണത്തെക്കുറിച്ചുള്ളതായിരുന്നു വിപുലമായ ചർച്ച.
ഭൂട്ടാനും ചൈനയും തമ്മിൽ അതിർത്തിയിൽ നടക്കുന്ന ചർച്ചകൾ ന്യൂദൽഹിയുടെ സുരക്ഷാ താൽപ്പര്യങ്ങൾക്ക് പ്രത്യാഘാതങ്ങൾ ഉണ്ടാക്കുമെന്നതിനാൽ ഇരു രാജ്യങ്ങളുടെയും സംവാദങ്ങൾ ഭാരതം സൂക്ഷ്മമായി നിരീക്ഷിക്കുന്നുണ്ട്. ജനുവരി 9 ന് നടന്ന ഭൂട്ടാൻ പാർലമെൻ്റ് തിരഞ്ഞെടുപ്പിൽ നാഷണൽ അസംബ്ലിയിലെ 47 സീറ്റുകളിൽ 30 സീറ്റും നേടിയ പീപ്പിൾസ് ഡെമോക്രാറ്റിക് പാർട്ടിയിൽ പെട്ടവരാണ് ടോബ്ഗേയും ധുങ്‌യേലും.
