പട്ന : ജനുവരി 22ന് അയോധ്യയിലെ ശ്രീരാമക്ഷേത്രം തകര്ക്കുമെന്ന് പൊലീസിനെ വിളിച്ച് ഭീഷണിപ്പെടുത്തിയ യുവാവ് അറസ്റ്റില്. ബിഹാറിലെ അരാരിയ ജില്ലയിലെ ഇന്റെഖാബ് ആലം (21) എന്നയാളെയാണ് ബിഹാര് പൊലീസ് പിടികൂടിയത്.
ശനിയാഴ്ച പാലാസി സ്റ്റേഷന് പരിധിയിലെ ബാലുവ കലിയഗഞ്ചിലെ വീട്ടില്നിന്നാണ് ഇയാളെ പിടികൂടിയത്. അധോലോക കുറ്റവാളി ദാവൂദ് ഇബ്രാഹിമിന്റെ അടുത്ത സഹായിയെന്ന് അവകാശപ്പെട്ടാണ് ഭീഷണി മുഴക്കിയത്. ഈ മാസം 19നാണ് പൗരന്മാര്ക്ക് അടിയന്തര സഹായം തേടാനുള്ള 112 എന്ന നമ്പറില് വിളിച്ച് ഇയാള് ഭീഷണിപ്പെടുത്തിയത്.
പേര് ഛോട്ടാ ഷക്കീല് ആണെന്നും ദാവൂദ് ഇബ്രാഹിമിന്റെ അടുത്ത സഹായിയാണെന്നും അവകാശപ്പെട്ട് ഫോണ് ചെയ്ത ഇന്റെഖാബ് ആലം ജനുവരി 22ന് അയോധ്യയിലെ രാമക്ഷേത്രം തകര്ക്കുമെന്നും പറഞ്ഞു. ഫോണ് സന്ദേശത്തിന് പിന്നാലെ പൊലീസ് വിശദാംശങ്ങള് സൈബര് സെല്ലുമായി പങ്കിട്ടു.
പ്രതി വിളിച്ച മൊബൈല് നമ്പര് ഇയാളുടെ പിതാവിന്റെ പേരിലുളളതാണെന്ന് കണ്ടെത്തി. പ്രതിക്ക് ക്രിമിനല് പശ്ചാത്തലമില്ലെന്നും മാനസിക അസ്വസ്ഥ്യമുണ്ടെന്നുമാണ് പൊലീസ് അറിയിച്ചത്.
