തിരുവനന്തപുരം: ലോക്‌സഭ തെരഞ്ഞെടുപ്പിന് മുന്നോടിയായി സംസ്ഥാനത്തെ പോലീസില്‍ അഴിച്ചുപണി തുടങ്ങി. ദക്ഷിണമേഖല ഐജി ജി. സ്പര്‍ജന്‍ കുമാറിന് സുരക്ഷാ വിഭാഗത്തിന്റെ അധിക ചുമതല നല്‍കി. വിജിലന്‍സ് ഐജി ഹര്‍ഷിത അട്ടല്ലൂരി പോലീസ് ആസ്ഥാനത്ത് ഐജിയാകും.
കൊച്ചി കമ്മീഷണര്‍ എ. അക്ബറിനെ ക്രൈംബ്രാഞ്ചിലേക്ക് മാറ്റി. തെരഞ്ഞെടുപ്പ് മാനദണ്ഡ പ്രകാരം സ്വന്തം ജില്ലയില്‍ ജോലി ചെയ്യാന്‍ പാടില്ലെന്ന നിബന്ധനയിലാണ് അക്ബറിനെ കൊച്ചി കമ്മീഷണര്‍ സ്ഥാനത്തു നിന്ന് മാറ്റിയത്. പകരം ആഭ്യന്തര സുരക്ഷാ വിഭാഗം ഐജി ശ്യാംസുന്ദര്‍ കൊച്ചി കമ്മീഷണറാകും. വയനാട് എസ്പിയായ പദംസിങിനെ പൊലീസ് ആസ്ഥാനത്തേക്ക് മാറ്റി. ടി. നാരായണനാണ് വയനാട് എസ്പി. ഉന്നത ഉദ്യോഗസ്ഥരെ കൂടാതെ അഞ്ച് അഡീ. എസ്പിമാരെയും 114 ഡിവൈഎസ്പിമാരെയും സ്ഥലം മാറ്റിയിട്ടുണ്ട്. ജോ. സെക്രട്ടറി ആര്‍. മണികണ്ഠന്റേതാണ് ഉത്തരവ്.
