മലപ്പുറം: ഓടിക്കൊണ്ടിരുന്ന സ്കൂട്ടറിന് തീപിടിച്ചു. പാണ്ടിക്കാട് കുപ്പൂത്ത് സ്വദേശി അനീഷ് സഞ്ചരിച്ചിരുന്ന ഹോണ്ട ഡിയോ സ്കൂട്ടറാണ് അഗ്നിക്കിരയായത്. മലപ്പുറം മുണ്ടുപറമ്പ് ബൈപ്പാസിൽ ഇന്നലെ ഉച്ചയ്ക്ക് 11.45-ഓടെയായിരുന്നു സംഭവം. മുണ്ടുപറമ്പ് ഭാഗത്തേക്ക് പോകുന്നതിനിടെ സ്കൂട്ടറിന് മിസ്സിംഗ് അനുഭവപ്പെടുകയും അമിതമായി ചൂടാകുകയുമായിരുന്നു. പിന്നാലെ പെട്ടെന്ന് പുക ഉയരുന്നതാണ് കണ്ടതെന്ന് അനീഷ് പറയുന്നു.
ഉടൻ തന്നെ സ്കൂട്ടർ റോഡിൽ നിന്നും തള്ളി സമീപമുള്ള വഴിയിലേക്ക് മാറ്റുകയായിരുന്നു. സെക്കൻഡുകൾക്കുള്ളിൽ വാഹനത്തിൽ തീ ആളിപ്പടർന്നതായി അനീഷ് പറയുന്നു. അഗ്നിശമന സേന സംഭവസ്ഥലത്തെത്തിയപ്പോഴേക്കും സ്കൂട്ടർ പൂർണമായും കത്തി നശിച്ചിരുന്നു. അര മണിക്കൂറോളമാണ് സ്കൂട്ടർ നിന്ന് കത്തിയത്.
200 മീറ്റർ അകലെ ഫയർഫോഴ്സ് യൂണിറ്റ് ഉണ്ടായിട്ടും എത്താൻ വൈകിയെന്ന ആരോപണവും ഉയരുന്നുണ്ട്. അനീഷ് മുണ്ടുപറമ്പിലേക്ക് എത്തി മടങ്ങവെയായിരുന്നു സംഭവം. 2017 മോഡൽ സ്കൂട്ടറാണ് കത്തിയത്.
