ന്യൂദല്ഹി : സാമ്പത്തികപ്രതിസന്ധിയുടെ പശ്ചാത്തലത്തില് കേരളത്തിന് മാത്രം പ്രത്യേക ഇളവു നല്കാന് കഴിയില്ലെന്ന് കേന്ദ്ര ധനമന്ത്രി നിര്മലാ സീതാരാമന്. രാജ്യമെമ്പാടും പ്രാബല്യത്തിലുളള പൊതു നിബന്ധനകളില് ഇളവിന് കഴിയില്ല.
2023-24 സാമ്പത്തിക വര്ഷം കേരളത്തിന്റെ മൊത്ത വായ്പാ പരിധി 47762.58 കോടി രൂപയാണ്. അതില് 29136.71 കോടി രൂപ പൊതു വിപണി വായ്പ പരിധിയാണ്. ബാക്കി തുക മറ്റ് സ്രോതസുകളില് നിന്നുള്ള വായ്പാ പരിധിയാണന്ന് മന്ത്രി പറഞ്ഞു.പാര്ലമെന്റില് എന്.കെ. പ്രേമചന്ദ്രന് എം.പി ക്കാണ് മന്ത്രി മറുപടി നല്കിയത്.
നിലവിലെ വായ്പാപരിധിക്ക് പുറമെ സംസ്ഥാനത്തിന്റെ മൊത്ത ആഭ്യന്തര ചരക്ക് സേവന ഉല്പാദനത്തിന്റെ ഒരു ശതമാനം കൂടി വായ്പാ കൂടുതലായി എടുക്കാന് അനുവദിക്കണമെന്ന് കേരളം ആവശ്യപ്പെട്ടിട്ടുണ്ട്.പൊതു വിപണിയില് നിന്നും കടമെടുക്കാനുളള പരിധിയില് 23,852 കോടി രൂപയുടെ വായ്പ എടുക്കുന്നതിന് ഇതിനകം കേന്ദ്രം അനുമതി നല്കിയിട്ടുണ്ട്. മറ്റ് സ്രോതസുകളില് നിന്നുളള വായ്പ സംസ്ഥാന സര്ക്കാരിന്റെ സമയാസമയങ്ങളിലുളള ആവശ്യപ്രകാരം എടുക്കാവുന്നതാണെന്നും നിര്മ്മല സീതാരാമന് വ്യക്തമാക്കി.
