പത്തനംതിട്ട: ലോകമാകെ യുദ്ധഭീഷണി നിലനില്‍ക്കുമ്പോഴും ഭാരതത്തിലെ പൊതുമേഖലാ ബാങ്കുകള്‍ സാമ്പത്തിക ഭദ്രത ഉറപ്പ് വരുത്തി മുന്നോട്ട് കുതിക്കുകയാണെന്ന് കണക്കുകള്‍ സൂചിപ്പിക്കുന്നു. ബാങ്കിങ് രംഗത്ത് നരേന്ദ്ര മോദി സര്‍ക്കാര്‍ നടപ്പിലാക്കിയ നൂതനവും, ശാസ്ത്രീയവുമായ പരിഷ്‌കാരങ്ങളും മികച്ച ഭരണനിര്‍വഹണ രീതികളുമാണ് പൊതുമേഖലാ ബാങ്കുകളെ ഇത്രയധികം ലാഭകരവും സുരക്ഷിതവുമായ നിലയിലേക്ക് കൈപിടിച്ച് ഉയര്‍ത്താന്‍ സാധിച്ചതെന്ന് സാമ്പത്തിക വിദഗ്ധര്‍ അഭിപ്രായപ്പെട്ടു.
ഭാരതത്തിലെ ഏറ്റവും വലിയ വാണിജ്യ ബാങ്കായ സ്റ്റേറ്റ് ബാങ്ക് ഓഫ് ഇന്ത്യയുടെ (എസ്ബിഐ) അറ്റാദായം (ഇയര്‍ ഓണ്‍ ഇയര്‍) 5.6ശതമാനം ഉയര്‍ന്ന് 19,684 കോടി രൂപയായി. അറ്റ പലിശ വരുമാനത്തിലും നാല് ശതമാനം വര്‍ദ്ധനയോടെ 44,380 കോടി രൂപയായെന്നും ബാങ്കിന്റെ ക്രെഡിറ്റ് ക്വാളിറ്റിയിലും സ്ഥിരതയുള്ള വര്‍ദ്ധനവാണ് രേഖപ്പെടുത്തുന്നതെന്നും ബാങ്ക് പുറത്തുവിട്ട കണക്കില്‍ സൂചിപ്പിക്കുന്നു. കൂടാതെ 2025-26 സാമ്പത്തിക വര്‍ഷത്തില്‍ രാജ്യത്തെ പൊതുമേഖലാ ബാങ്കുകള്‍ എല്ലാം എക്കാലത്തെയും ഉയര്‍ന്ന അറ്റാദായം രേഖപ്പെടുത്തിയിട്ടുണ്ട്.
മുന്‍ വര്‍ഷത്തെ അപേക്ഷിച്ച് 11 ശതമാനം വളര്‍ച്ചയോടെ 1.98 ലക്ഷം കോടിരൂപയാണ് ബാങ്കുകള്‍ക്ക് അറ്റാദായം ലഭിച്ചത്. തുടര്‍ച്ചയായ നാലാം വര്‍ഷമാണ് പൊതുമേഖലാ ബാങ്കുകള്‍ ലാഭക്ഷമത നിലനിര്‍ത്തുന്നതെന്ന പ്രത്യേകതയും ഉണ്ട്. ബാങ്കിങ് മേഖലയില്‍ ശക്തമായ ബിസിനസ് വളര്‍ച്ചയും ആസ്തി നിലവാരത്തിലെ പുരോഗതിയുമാണ് ഈ ചരിത്ര നേട്ടത്തിന് പിന്നിലെ പ്രധാന ഘടകങ്ങള്‍. കഴിഞ്ഞ സാമ്പത്തിക വര്‍ഷം ബിസിനസ് രംഗത്ത് 12.8ശതമാനം വളര്‍ച്ച നേടി 283.3 ലക്ഷം കോടിരൂപയില്‍ എത്തിയിരുന്നു. നിക്ഷേപ രംഗത്ത് 10.6ശതമാനം ഉയര്‍ന്ന് 156.3 ലക്ഷം കോടിയായി.
15.7 ശതമാനം വാര്‍ഷിക വളര്‍ച്ചാ നിരക്ക് രേഖപ്പെടുത്തിയതോടെ ആകെ വായ്‌പകള്‍ 127 ലക്ഷം കോടി രൂപയായി വര്‍ദ്ധിച്ചതായും കണക്കുകള്‍ സൂചിപ്പിക്കുന്നു. റീട്ടെയില്‍ വായ്‌പയില്‍ 18.1ശതമാനം, കാര്‍ഷിക വായ്‌പയില്‍ 15.5 ശതമാനവും എംഎസ്എംഇ വായ്‌പയില്‍ 18.2 ശതമാനം വളര്‍ച്ചയുമാണ് രേഖപ്പെടുത്തിയത്. കൂടാതെ ബാങ്കുകളുടെ കിട്ടാക്കടം ചരിത്രത്തിലെ തന്നെ ഏറ്റവും കുറഞ്ഞ നിരക്കാണ് കഴിഞ്ഞ സാമ്പത്തിക വര്‍ഷത്തില്‍ ഉണ്ടായിട്ടുള്ളത്. 86,971 കോടിരൂപ ഈ ഇനത്തില്‍ തിരിച്ചുപിടിക്കാന്‍ ബാങ്കുകള്‍ക്ക് സാധിച്ചിട്ടുണ്ട്. ഓരോ പൊതുമേഖലാ ബാങ്കുകളും 90 ശതമാനത്തിന് മുകളില്‍ പ്രൊവിഷനിങ് കവറേജ് റേഷ്യോ നിലനിര്‍ത്തുന്നത് മൂലം ബാലന്‍സ് ഷീറ്റിന്റെ കരുത്ത് വര്‍ദ്ധിപ്പിക്കുന്നതായി സാമ്പത്തിക വിദഗ്ധര്‍ ചൂണ്ടിക്കാണിക്കുന്നു. അതോടൊപ്പം കേന്ദ്രസര്‍ക്കാര്‍ ലക്ഷ്യംവയ്‌ക്കുന്ന വികസിത ഭാരതം എന്ന പ്രയാണത്തില്‍ പൊതുമേഖലാ ബാങ്കുകളുടെ ഈ സാമ്പത്തിക വളര്‍ച്ച നിര്‍ണായകമാകുമെന്നും കണക്കാക്കപ്പെടുന്നുണ്ട്.
ജന്മഭൂമി ഓണ്‍ലൈന്‍