അപ്രതീക്ഷിതമായി നടന്‍ റാം ചരണ്‍ തേജയെ ക്ഷേത്രത്തില്‍ കണ്ടവര്‍ ഒന്നു ഞെട്ടി.ആദ്യത്തെ ഞെട്ടല്‍ മാറിയപ്പോള്‍ അവര്‍ താരത്തെ വളഞ്ഞു. സെല്‍ഫി എടുക്കാന്‍ മത്സരമായി.
കര്‍ണാടകയിലെ മൈസൂരില്‍ നിന്ന് 13 കിലോമീറ്റര്‍ അകലെ ചാമുണ്ഡി മലനിരകളിലെ ശ്രീ ചാമുണ്ഡേശ്വരി ക്ഷേത്രത്തിലാണ് സംഭവം.ഞായറാഴ്ച പുലര്‍ച്ചെ ക്ഷേത്രത്തിലെത്തിയ രാം തരണ്‍ തേജ അവിടെ പൂജയിലും സംബന്ധിച്ചു.രാജ്യത്തിന്റെ വിവിധ ഭാഗങ്ങളില്‍ നിന്നുള്ള ധാരാളം വിനോദസഞ്ചാരികള്‍ ഇവിടെയെത്തുന്നുണ്ട്.
ശങ്കര്‍ സംവിധാനം ചെയ്യുന്ന ഗെയിം ചേഞ്ചറിന്റെ ചിത്രീകരണത്തിനാണ് താരം മൈസുരുവില്‍ എത്തിയത്. താരത്തിന്റെ ക്ഷേത്രദര്‍ശന വീഡിയോ സമൂഹമാധ്യമങ്ങളില്‍ വൈറലായി. ക്ഷേത്രം അധികൃതര്‍ സമ്മാനിച്ച ഷാള്‍ തോളിലിട്ട് രാം ചരണ്‍ നടന്നു നീങ്ങുന്നത് ദൃശ്യങ്ങളില്‍ കാണാം.
സംവിധായകന്‍ ശങ്കറിന്റെ ടോളിവുഡ് അരങ്ങേറ്റം കുറിക്കുന്ന ചിത്രമാണ് ഗെയിം ചേഞ്ചര്‍. എസ് ജെ സൂര്യ, ജയറാം, അഞ്ജലി, സുനില്‍, ശ്രീകാന്ത്, സമുദ്രക്കനി, നാസര്‍, നവീന്‍ ചന്ദ്ര, രാജീവ് കനകല, ശുഭലേഖ സുധാകര്‍ , കിയാര അദ്വാനി എന്നിവര്‍ പ്രധാന കഥാപാത്രങ്ങളെ അവതരിപ്പിക്കുന്നു.
ചിത്രീകരണം 2021 ഒക്ടോബറില്‍ ആരംഭിച്ചുവെന്നും ഭൂരിഭാഗം രംഗങ്ങളും പൂര്‍ത്തിയായെന്നും നിര്‍മ്മാതാവ് ദില്‍ രാജു അടുത്തിടെ വെളിപ്പെടുത്തിയിരുന്നു. തെലങ്കാന നിയസഭാ തെരഞ്ഞെടുപ്പില്‍ വോട്ട് രേഖപ്പെടുത്താന്‍ റാം ചരണ്‍ തേജ കഴിഞ്ഞയാഴ്ച ചിത്രീകരണത്തില്‍ നിന്ന് ഇടവേള എടുത്തിരുന്നു.
