തിരുവനന്തപുരം: ലോകസഭാ തെരഞ്ഞെടുപ്പിലും അട്ടിമറി നടത്താനുള്ള പരീശീലനമാണ് യൂത്ത് കോണ്‍ഗ്രസിന് ലഭിക്കുന്നതെന്ന് കേന്ദ്രമന്ത്രി വി. മുരളീധരന്‍. കോണ്‍ഗ്രസ് നേതൃത്വവും രാഹുല്‍ഗാന്ധിയും മൗനം വെടിഞ്ഞ് ഇക്കാര്യത്തില്‍ നിലപാട് പറയണം. പരാതിയില്‍ ബന്ധപ്പെട്ട ഏജന്‍സികള്‍ വേണ്ടപ്പെട്ട നടപടിയെടുക്കുമെന്നും വി. മുരളീധരന്‍ മാധ്യമങ്ങളോട് പറഞ്ഞു.
കോണ്‍ഗ്രസ് ജനാധിപത്യത്തെ അട്ടിമറിക്കാന്‍ തന്ത്രങ്ങളുമായി ഇറങ്ങുന്നത് രാജ്യം മുന്‍പും കണ്ടിട്ടുള്ളതാണ്. ആപ്പിളിന്റെ സന്ദേശം വന്നാലുടന്‍ ഫോണ്‍ ചോര്‍ത്തലെന്ന് ആരോപിക്കുന്ന രാഹുല്‍ഗാന്ധി ഇത് കണ്ടില്ലെന്ന് നടിക്കുകയാണോ എന്നും മന്ത്രി ചോദിച്ചു. സ്വന്തം സംഘടനയിലെ വ്യാജരേഖയുണ്ടാക്കുന്നവരേയും ക്രമക്കേട് നടത്തുന്നവരേയും കോണ്‍ഗ്രസ് അംഗീകരിക്കുന്നു എന്നാണോ ജനം മനസിലാക്കേണ്ടത് എന്നും വി. മുരളീധരന്‍ ചോദിച്ചു.
