ദീപാവലി പടിവാതിലില് എത്തി നില്ക്കുകയാണ്. പുത്തന് വസ്ത്രം വാങ്ങുന്നതിന്റെയും മറ്റ് തിരക്കുകളിലാകും മിക്കവരും. മധുരപലഹാരങ്ങളും പടക്കവും പൂത്തിരിയുമൊക്കെ വാങ്ങി ആഘോഷം പൊടിപൊടിക്കുന്നതിനിടെ ഇത്തവണ അല്പ്പം വ്യത്യസ്തമായി ആഘോഷിച്ചാലോ.
ദീപാവലിയില് ഒഴിച്ചുകൂടാനാകാത്ത ഒന്നാണ് മധുരം.രണ്ട് കിടിലന് മധുരപലഹാരം ഉണ്ടാക്കുന്നതെങ്ങനെ എന്ന് നോക്കാം..
ജിലേബി
ആവശ്യമായ സാധനങ്ങൾ
ഉഴുന്നുപരിപ്പ് – ഒരു കപ്പ്
പച്ചരി – ഒരു വലിയ സ്പൂൺ
പഞ്ചസാര – രണ്ടു കപ്പ്
വെള്ളം – അര കപ്പ്
ജിലേബി കളർ – ഒരു നുള്ള്
റോസ് എസൻസ് – പാകത്തിന്
തയ്യാറാക്കുന്ന വിധം :-ഉഴുന്നുപരിപ്പും അരിയും ഒരുമണിക്കൂർ കുതിർക്കുക. പഞ്ചസാരയിൽ വെള്ളം ചേർത്ത് ഉരുക്കി നൂൽ പാനിയാകുമ്പോൾ വാങ്ങിവയ്ക്കുക. ഇതിൽ ജിലേബി കളർ കലക്കിയതും എസൻസും ചേർത്തുവയ്ക്കുക. കുതിർത്ത ഉഴുന്നും അരിയും ശരിക്ക് പതയത്തക്കവിധത്തിൽ ആട്ടുക. ജിലേബി കളറും ചേർക്കണം.
ചുവടു പരന്ന പാത്രത്തിൽ നെയ്യൊഴിച്ചു നല്ലതുപോലെ ചൂടാകുമ്പോൾ ബട്ടൺഹോൾ തയ്ച്ച തുണിയിൽ ആട്ടിയ ഉഴുന്നുമാവ് അൽപ്പാൽപ്പം വാരിയിട്ടു കൈകൊണ്ടമർത്തി നെയ്യിലേക്കു ജിലേബിയുടെ ആകൃതിയിൽ ഞെക്കിപ്പിഴിയുക.
ചെറിയ ദ്വാരമുള്ള ചിരട്ട ഉപയോഗിച്ചും ജിലേബി മാവ് പിഴിയാം. പാകത്തിനു മൂപ്പിച്ച ജിലേബി ഇളംചൂടുള്ള പഞ്ചസാര സിറപ്പിലിട്ട് ഓരോന്നായെടുത്തു പരന്ന തട്ടത്തിൽ വയ്ക്കുക.
ബനാന ഹൽവ
ആവശ്യമായ സാധനങ്ങൾ
പഴം –5 എണ്ണം
നെയ്യ് –മുക്കാൽ കപ്പ്
പഞ്ചസാര പൊടിച്ചത്– മുക്കാൽ കപ്പ്
ഡ്രൈ ഫ്രൂട്ട്സ് – 3 സ്പൂൺ
ഏലയ്ക്ക പൊടി–കാൽ ടീ സ്പൂൺ
ഡെസിക്കേറ്റഡ് കോക്കനട്ട്– ഒന്നര കപ്പ്
കോൺഫ്ലവർ–അരക്കപ്പ്
തയ്യാറാക്കുന്ന വിധം ;- പഴം മിക്സിയിൽ നന്നായി അടിച്ച് പേസ്റ്റാക്കുക. പാൻ വച്ച് നന്നായി ചൂടാകുമ്പോൾ നെയ്യ് ഒഴിക്കുക. അതിൽ ഡ്രൈ ഫ്രൂട്ട്സ് ഇട്ട് വറുക്കുക. ഇതിലേയ്ക്ക് പേസ്റ്റാക്കി വച്ചിരിക്കുന്ന പഴം ചേർക്കുക. തുടർച്ചയായി ഇളക്കി കുറുകുന്ന പരുവമാകുമ്പോൾ ഏലയ്ക്കപ്പൊടി ചേർക്കുക. കുറച്ചുകൂടെ കുറുകുമ്പോൾ ഡെസിക്കേറ്റഡ് കോക്കനട്ട് ചേർത്ത് നന്നായി യോജിപ്പിക്കുക. അതിനു ശേഷം പഞ്ചസാര പൊടിച്ചത് ചേർക്കുക. നന്നായി യോജിച്ച് കഴിയുമ്പോൾ കോൺഫ്ലവർ വെള്ളത്തിൽ ലയിപ്പിച്ച് ഒഴിക്കുക.
നന്നായി കുറുകി പാനിൽ നിന്നു വിട്ടു വരുന്ന പരുവത്തിൽ ഒരു ബൗളിലേക്കു മാറ്റാം. നട്സോ കുങ്കുമപ്പൂവോ ഉപയോഗിച്ച് അലങ്കരിക്കാം.
