മുംബയ് : യാത്രക്കാരെ സഹായിക്കാന് നിര്മ്മിത ബുദ്ധിയില് പ്രവര്ത്തിക്കുന്ന ‘മഹാരാജ’ എന്ന വിര്ച്വല് ഏജന്റിനെ വിന്യസിക്കുന്ന ലോകത്തെആദ്യത്തെ എയര്ലൈന് ആയി എയര് ഇന്ത്യ . എ ഐ അടിസ്ഥാനമാക്കിയുള്ള ഏജന്റിന് നാല് ഭാഷകളിലായി 6,000 ചോദ്യങ്ങള്ക്ക് ഉത്തരം നല്കാന് കഴിയും. 80% ചോദ്യങ്ങള്ക്കും സെക്കന്ഡുകള്ക്കുള്ളില് ഉത്തരം ലഭിക്കും.
1,300 ഇനങ്ങളില് ഉപഭോക്തൃ ചോദ്യങ്ങള്ക്ക് ഉത്തരം നല്കാന് ഏജന്റിന് പരിശീലനം നല്കിയിട്ടുണ്ട്. ഇതില് വിമാനങ്ങളുടെ സ്ഥിതി,ബാഗേജ് അലവന്സുകള്, വിമാന സമയ മാറ്റം,റീഫണ്ടുകള്, ചെക്ക്-ഇന്,പാക്കിംഗ് നിയന്ത്രണങ്ങള് എന്നിവയും ഉള്പ്പെടുന്നു.
എയര് ഇന്ത്യയുടെ മഹാരാജ നിലവില് ഹിന്ദി, ഇംഗ്ലീഷ്, ഫ്രഞ്ച്, ജര്മ്മന് എന്നീ നാല് ഭാഷകളില് മറുപടി നല്കും. അതേസമയം, 15% ഉപഭോക്തൃ അന്വേഷണങ്ങള്ക്ക് അധിക സഹായം ആവശ്യമാണ്. മഹാരാജയ്ക്ക് ഈ ചോദ്യങ്ങള് തിരിച്ചറിയാനും എയര് ഇന്ത്യയുടെ കോണ്ടാക്റ്റ് സെന്റര് ഏജന്റുമാരിലേക്ക് അവ സുഗമമായി കൈമാറാനും കഴിയുമെന്ന് ഉദ്യോഗസ്ഥര് പറഞ്ഞു.
ടാറ്റ സണ്സിന്റെ ഉടമസ്ഥതയിലുള്ള എയര്ലൈന് കമ്പനി ഈ വര്ഷം മാര്ച്ചില് ഈ നിര്മ്മിത ബുദ്ധി അധിഷ്ഠിത ഏജന്റിന്റെ പരീക്ഷണം ആരംഭിച്ചിരുന്നു.
ഇനിയും നിരവധി പുതുമകള് അണിയറയിലുണ്ടെന്നും വരും മാസങ്ങളില് അവതരിപ്പിക്കുമെന്നും കമ്പനി അറിയിച്ചു.
പ്രതികരിക്കാൻ ഇവിടെ എഴുതുക: