ന്യൂദല്‍ഹി : ഭാരതത്തില്‍ ഭീകര പ്രവര്‍ത്തനങ്ങള്‍ക്ക് ആസൂത്രണം നല്‍കിയ ഭീകരന് കൊല്ലപ്പെട്ട നിലയില്‍ കണ്ടെത്തി. മിയ മുജാഹിദ് എന്നറിയപ്പെടുന്ന ഖ്വാജ ഷാഹിദ് എന്ന ഭീകരനാണ് കൊല്ലപ്പെട്ടത്. പാക് അധീന കശ്മീരില്‍ കഴുത്തറത്തു കൊല്ലപ്പെട്ട നിലയില്‍ കഴിഞ്ഞ ദിവസമാണ് കണ്ടെത്തിയത്.
ലഷ്‌കര്‍ ഇ തോയ്ബ കമാന്‍ഡറായ ഖ്വാജ ഷാഹിദിന്റെ ശരീരത്തില്‍ നിരവധി മുറിവുകള്‍ ഉണ്ടായിരുന്നു. അതുകൊണ്ടുതന്നെ ആക്രണമണത്തിനിടെ കൊല്ലപ്പെട്ടതാണെന്നാണ് വിലയിരുത്തല്‍. ജമ്മുവിലെ സുന്‍ജ്വാന്‍ കരസേനാ ക്യാംപില്‍ 2018 ഫെബ്രുവരി 10നുണ്ടായ ഭീകരാക്രമണത്തില്‍ അഞ്ച് സൈനികരും ഒരു സാധാരണക്കാരനുമാണ് വീരമൃത്യൂ വരിച്ചത്.
പാക് അധിനിവേശ കശ്മീരിലെ നീലം താഴ്വര സ്വദേശിയാണ് ഖ്വാജാ ഷാഹിദ്. ഇയാളെ ഏതാനും ദിവസം മുന്‍പ് തോക്കുധാരികളായ അജ്ഞാതര്‍ തട്ടിക്കൊണ്ടുപോയിരുന്നു. തുടര്‍ന്ന് പാക് രഹസ്യാന്വേഷണ ഏജന്‍സിയായ ഐഎസ്‌ഐ ഇയാളെ കണ്ടെത്താന്‍ തിരച്ചിലും നടത്തി വരികയായിരുന്നു. ഭാരതത്തിന്റെ വാണ്ടഡ് ലിസ്റ്റില്‍ ഇടം പിടിച്ചിട്ടുള്ള 18 ഭീകരരാണ് കഴിഞ്ഞ 20 മാസത്തിനുള്ളില്‍ വിവിധ രാജ്യങ്ങളിലായി മരിച്ചത്.
