നിക്ഷേപ സൗഹൃദ നയങ്ങള്‍ രാജ്യത്തെ ഭക്ഷ്യ മേഖലയെ പുതിയ ഉയരങ്ങളിലേക്ക് കൊണ്ടുപോകുന്നു: നരേന്ദ്രമോദി

ന്യൂദല്‍ഹി: ഇന്ത്യയുടെ നിക്ഷേപ സൗഹൃദ നയങ്ങള്‍ രാജ്യത്തെ ഭക്ഷ്യ മേഖലയെ പുതിയ ഉയരങ്ങളിലേക്ക് കൊണ്ടുപോകുന്നുവെന്ന് പ്രധാനമന്ത്രി നരേന്ദ്ര മോദി . ഇന്ത്യയുടെ ഭക്ഷ്യ വൈവിധ്യം ആഗോള നിക്ഷേപകര്‍ക്ക് ഗുണകരമാണെന്നും ‘വേള്‍ഡ് ഫുഡ് ഇന്ത്യ 2023’ ന്റെ രണ്ടാം പതിപ്പ് ന്യൂദല്‍ഹിയില്‍ ഉദ്ഘാടനം ചെയ്തുകൊണ്ട് മോദി പറഞ്ഞു. ഇരുപത്തിയൊന്നാം നൂറ്റാണ്ടില്‍ ലോകം നേരിടുന്ന പ്രധാന വെല്ലുവിളികളിലൊന്നാണ് ഭക്ഷ്യസുരക്ഷയെന്ന് അദ്ദേഹം പറഞ്ഞു. ഭക്ഷ്യ മേഖലയിലെ സ്റ്റാര്‍ട്ടപ്പുകള്‍ക്കും കമ്പനികള്‍ക്കും ഇതൊരു സുവര്‍ണാവസരമാണെന്നും ഭക്ഷ്യ സംസ്‌കരണ വ്യവസായത്തിന്റെ എല്ലാ മേഖലകളിലും ഇന്ത്യ ശ്രദ്ധേയമായ വളര്‍ച്ച കൈവരിച്ചിട്ടുണ്ടെന്നും അദ്ദേഹം എടുത്തുപറഞ്ഞു.

പാക്ക് ചെയ്ത ഭക്ഷണത്തിന്റെ ആവശ്യം ഗണ്യമായി വര്‍ദ്ധിച്ചിട്ടുണ്ടെന്നും ഇത് കര്‍ഷകര്‍ക്കും സ്റ്റാര്‍ട്ടപ്പുകള്‍ക്കും സംരംഭകര്‍ക്കും അവസരങ്ങള്‍ സൃഷ്ടിക്കുന്നുവെന്നും നരേന്ദ്രമോദി കൂട്ടിച്ചേര്‍ത്തു.

കേന്ദ്ര സര്‍ക്കാരിന്റെ വ്യവസായ-കര്‍ഷക അനുകൂല നയങ്ങളുടെ ഫലമായി കഴിഞ്ഞ ഒമ്പത് വര്‍ഷത്തിനിടെ 50,000 കോടിയിലധികം രൂപയുടെ നേരിട്ടുള്ള വിദേശ നിക്ഷേപം ഈ മേഖലയിലേക്ക് ആകര്‍ഷിക്കപ്പെട്ടുവെന്ന് പ്രധാനമന്ത്രി പറഞ്ഞു. ഭക്ഷ്യ സംസ്‌കരണ മേഖലയിലെ ഉത്പാദന ബന്ധിത പ്രചോദന പദ്ധതിയിലേക്ക് വെളിച്ചം വീശിക്കൊണ്ട്, വ്യവസായത്തില്‍ പുതുതായി കടന്നുവന്നവര്‍ക്ക് ഇത് വലിയ സഹായം നല്‍കുന്നുണ്ടെന്ന് അദ്ദേഹം പറഞ്ഞു.

കഴിഞ്ഞ ഒമ്പത് വര്‍ഷത്തിനിടെ, ഇന്ത്യയുടെ കാര്‍ഷിക കയറ്റുമതിയില്‍ സംസ്‌കരിച്ച ഭക്ഷ്യവസ്തുക്കളുടെ പങ്ക് 13 ശതമാനത്തില്‍ നിന്ന് 23 ശതമാനമായി വര്‍ധിച്ചു. സംസ്‌കരിച്ച ഭക്ഷ്യവസ്തുക്കളുടെ കയറ്റുമതി 150 ശതമാനം വര്‍ധിച്ചുവെന്ന് പ്രധാനമന്ത്രി അറിയിച്ചു. കാര്‍ഷികോല്‍പ്പന്നങ്ങളുടെ മൊത്തത്തിലുള്ള കയറ്റുമതി മൂല്യത്തില്‍ 50,000 ദശലക്ഷം ഡോളറുമായി ഇന്ത്യ ഇന്ന് ഏഴാം സ്ഥാനത്താണ് നില്‍ക്കുന്നതെന്ന് മോദി പറഞ്ഞു.

ഭക്ഷ്യ സംസ്‌കരണ വ്യവസായത്തെ നയിക്കാനുള്ള സ്വാഭാവിക കഴിവ് ഇന്ത്യയിലെ സ്ത്രീകള്‍ക്കുണ്ടെന്ന് പ്രധാനമന്ത്രി ചൂണ്ടിക്കാട്ടി. ഈ മേഖലയിലെ സ്ത്രീകളെ സഹായിക്കുന്നുണ്ടെന്നും അദ്ദേഹം പറഞ്ഞു.

ഇന്ത്യയുടെ പൂര്‍വ്വികര്‍ ഭക്ഷണ ശീലങ്ങളെ ആയുര്‍വേദവുമായി ബന്ധപ്പെടുത്തിയിട്ടുണ്ടെന്നും മോദി പറഞ്ഞു. ഇന്ത്യയുടെ ഭക്ഷ്യ വിജ്ഞാന സമ്പത്തില്‍ നിന്ന് ലോകം മുഴുവന്‍ നേട്ടമുണ്ടാക്കുമെന്നും അദ്ദേഹം പറഞ്ഞു. ഈ വര്‍ഷം അന്താരാഷ്‌ട്ര ചെറുധാന്യ വര്‍ഷം ആഘോഷിക്കുകയാണെന്നും ഇന്ത്യ ചെറു ധാന്യങ്ങള്‍ക്ക് ശ്രീ അന്ന പദവി നല്‍കിയിട്ടുണ്ടെന്നും അദ്ദേഹം എടുത്തുപറഞ്ഞു.

ഭക്ഷണം പാഴാക്കുന്നത് ഒഴിവാക്കണമെന്നും പ്രധാനമന്ത്രി ഊന്നിപ്പറഞ്ഞു.വേള്‍ഡ് ഫുഡ് ഇന്ത്യയില്‍ പ്രദര്‍ശിപ്പിച്ച സാങ്കേതികവിദ്യയെയും സ്റ്റാര്‍ട്ടപ്പ് പവലിയനെയും ഫുഡ് സ്ട്രീറ്റിനെയും അഭിനന്ദിച്ച അദ്ദേഹം സാങ്കേതികവിദ്യയുടെയും രുചിയുടെയും സംയോജനം ഭാവിയിലെ സമ്പദ്വ്യവസ്ഥയ്‌ക്ക് വഴിയൊരുക്കുമെന്ന് പറഞ്ഞു.