ന്യൂദല്‍ഹി: അഞ്ച് സംസ്ഥാനങ്ങളിലെ നിയമസഭാ തെരഞ്ഞെടുപ്പ് കണക്കിലെടുത്ത് നവംബര്‍ ഏഴു മുതല്‍ നവംബര്‍ 30 വരെ എക്‌സിറ്റ് പോള്‍ ഫലങ്ങള്‍ പ്രസിദ്ധീകരിക്കുന്നതും പരസ്യപ്പെടുത്തുന്നതും ഇന്ത്യന്‍ തെരഞ്ഞെടുപ്പ് കമ്മീഷന് ചൊവ്വാഴ്ച നിരോധിച്ചു. നവംബര്‍ എഴിന് രാവിലെ ഏഴു മണി മുതല്‍ നവംബര്‍ 30ന് വൈകുന്നേരം 6.30 വരെ നിരോധനം തുടരുമെന്ന് കമ്മീഷന് അറിയിച്ചു.
പ്രിന്റ് അല്ലെങ്കില്‍ ഇലക്‌ട്രോണിക് മാധ്യമങ്ങള്‍ മുഖേന എക്‌സിറ്റ് പോള്‍ നടത്തുന്നതും പ്രസിദ്ധീകരിക്കുന്നതും പരസ്യപ്പെടുത്തുന്നതും മറ്റേതെങ്കിലും രീതിയില്‍ പ്രചരിപ്പിക്കുന്നതും, മുന്‍പറഞ്ഞ പൊതുതിരഞ്ഞെടുപ്പുകളുമായും ഉപതിരഞ്ഞെടുപ്പുമായും ബന്ധപ്പെട്ട ഏതെങ്കിലും എക്‌സിറ്റ് പോള്‍ ഫലം നിരോധിക്കുമെന്ന് വിജ്ഞാപനം വ്യക്തമാക്കി.
ആളുകള്‍ തങ്ങളുടെ സ്ഥാനാര്‍ത്ഥികള്‍ക്ക് വോട്ട് ചെയ്തതിന് ശേഷം ഉടന്‍ നടത്തുന്ന സര്‍വേയാണ് എക്‌സിറ്റ് പോള്‍. രാഷ്‌ട്രീയ പാര്‍ട്ടികള്‍ക്കും അവരുടെ സ്ഥാനാര്‍ത്ഥികള്‍ക്കുമുള്ള പിന്തുണ വിലയിരുത്താന്‍ ഈ ഉപകരണം സഹായിക്കുന്നു.
നവംബര്‍ 7ന് മിസോറാം, നവംബര്‍ 7നും 17നും ഛത്തീസ്ഗഡ്, നവംബര്‍ 17ന് മധ്യപ്രദേശ്, നവംബര്‍ 25ന് രാജസ്ഥാന്‍, നവംബര്‍ 30ന് തെലങ്കാന എന്നിങ്ങനെയാണ് അഞ്ച് സംസ്ഥാനങ്ങളിലെ തെരഞ്ഞെടുപ്പ് തീയതികള്‍.
എല്ലാ സംസ്ഥാനങ്ങളിലെയും വോട്ടെണ്ണല്‍ ഡിസംബര്‍ മൂന്നിന് നടക്കും. അഞ്ച് സംസ്ഥാനങ്ങളില്‍ ഛത്തീസ്ഗഡില്‍ രണ്ട് ഘട്ടങ്ങളിലായാണ് വോട്ടെടുപ്പ്. തിരഞ്ഞെടുപ്പ് തീയതി പ്രഖ്യാപിച്ചതോടെ മാതൃകാ പെരുമാറ്റച്ചട്ടം നിലവില്‍ വന്നു.
അടുത്ത വര്‍ഷം ഏപ്രില്‍മെയ് മാസങ്ങളില്‍ നടക്കാനിരിക്കുന്ന ലോക്‌സഭാ തിരഞ്ഞെടുപ്പിന് മാസങ്ങള്‍ ബാക്കിനില്‍ക്കെയാണ് ഈ തിരഞ്ഞെടുപ്പുകള്‍ നടക്കുന്നത്. മുഖ്യ തിരഞ്ഞെടുപ്പ് കമ്മീഷണറുടെ കണക്കനുസരിച്ച് ഏകദേശം 16 കോടി വോട്ടര്‍മാര്‍ ഈ തെരഞ്ഞെടുപ്പുകളില്‍ വോട്ട് ചെയ്യാന്‍ അര്‍ഹരാണ്.
