ന്യൂദല്ഹി: വിവിധ കേന്ദ്ര സര്ക്കാര് സ്ഥാപനങ്ങളില് ജോലി ലഭിച്ച 51,000 പേര്ക്ക് ഇന്ന് നിയമന ഉത്തരവ് കൈമാറും. വീഡിയോ കോണ്ഫറന്സ് വഴി പ്രധാനമന്ത്രി നരേന്ദ്ര മോദി തൊഴില് ലഭിച്ചവരെ അഭിസംബോധന ചെയ്യും. കേരളത്തിലടക്കം റോസ്ഗാര് മേളകളുണ്ട്.
രാജ്യത്തുടനീളം 37 സ്ഥലങ്ങളിലാണ് ഇന്നത്തെ തൊഴില് മേളകള്. റെയില്വെ, തപാല്, ആഭ്യന്തരം, റവന്യൂ, ഉന്നത വിദ്യാഭ്യാസം, സ്കൂള് വിദ്യാഭ്യാസം, സാക്ഷരത, ആരോഗ്യ കുടുംബ ക്ഷേമം എന്നീ മന്ത്രാലയങ്ങളിലും വകുപ്പുകളിലുമാണ് ജോലി. തൊഴിലവസരങ്ങളുണ്ടാക്കുന്നതിന് ഉയര്ന്ന മുന്ഗണന നല്കണമെന്ന പ്രധാനമന്ത്രിയുടെ നിര്ദേശ പ്രകാരമാണ് രാജ്യമെങ്ങും തൊഴില് മേളകള് നടത്തി നിയമന ഉത്തരവുകള് കൈമാറുന്നത്.
പുതുതായി ജോലി കിട്ടിയവര്ക്ക് കര്മയോഗി പോര്ട്ടലിലെ ഓണ്ലൈന് മൊഡ്യൂള് കര്മയോഗി പ്രാരംഭ് വഴി സ്വയം പരിശീലിക്കാം. ‘എവിടെയും ഏതുപകരണവും’ പഠന ഫോര്മാറ്റ് ഭാഗമായി 750ല് അധികം ഇ ലേണിങ് കോഴ്സുകള് ഇവിടെ ലഭ്യമാണ്.
