കൊച്ചി: വാളയാര്‍ കേസിലെ പ്രതിയായ കുട്ടിമധുവിന്റെ ദുരൂഹമരണം സംബന്ധിച്ച് സമഗ്രമായ അന്വേഷണം നടത്തണമെന്ന് ആവശ്യപ്പെട്ട് വാളയാറില്‍ കൊല്ലപ്പെട്ട രണ്ടു പെണ്‍കുട്ടികളുടെ അമ്മ വി. ഭാഗ്യവതിയും വാളയാര്‍ നീതി സമരസമിതിയും ആലുവ റൂറല്‍ എസ്പിക്കും സിബിഐക്കും കത്തു നല്കി.
കേസില്‍ പോലീസ് അന്വേഷണം നടക്കുമ്പോള്‍ തന്നെ ജോണ്‍ പ്രവീണ്‍ എന്ന പ്രതിയെന്ന് സംശയിക്കപ്പെട്ടയാള്‍ ആത്മഹത്യ ചെയ്തിരുന്നു. ഇതേ കേസില്‍ മറ്റൊരു പ്രതിയായ പ്രദീപ് മുമ്പ് ആത്മഹത്യ ചെയ്തിരുന്നു. അന്വേഷണം നടക്കുന്ന ഘട്ടത്തില്‍ പ്രതികള്‍ ദുരൂഹമായി മരിക്കുന്നതിനു പിന്നില്‍ സ്ഥാപിത താത്പര്യങ്ങള്‍ ഉണ്ടെന്ന് സംശയിക്കുന്നതായി കത്തില്‍ പറയുന്നു.
ഈ കേസ് അന്വേഷണം അട്ടിമറിക്കാനും ഇനിയും കേസില്‍ പ്രതിയാക്കപ്പെടാന്‍ സാധ്യതയുള്ളവരെ രക്ഷിക്കാനുമുള്ള താത്പര്യം ഇതിനു പിന്നില്‍ ഉണ്ടാകാം. ഈ സാഹചര്യത്തില്‍ ഈ മരണം സംബന്ധിച്ച് സമഗ്രമായ അന്വേഷണം നടത്തണമെന്നും മരിച്ചയാളുമായി ബന്ധപ്പെട്ട രേഖകളും ടെലിഫോണും അടിയന്തരമായി കസ്റ്റഡിയില്‍ എടുക്കണമെന്നും കത്തില്‍ ആവശ്യപ്പെട്ടിണ്ട്.
