ചെന്നൈ: ബംഗ്ലാദേശിനെതിരായ മത്സരത്തിനിടെ കൈയ്യില് ത്രോ കൊണ്ട ന്യൂസീലന്ഡ് നായകന് കെയന് വില്ല്യംസണിന് ലോകകപ്പില് ഇനിയും പുറത്തിരിക്കേണ്ടിവരും. ഏറുകൊണ്ടതിനെ തുടര്ന്ന് താരത്തിന്റെ ഇടംകൈയിലെ തള്ളവിരലിന്റെ എല്ലിന് പൊട്ടലുണ്ട്. വിശ്രമം വേണ്ടിവരുന്നതിനാല് ലോകകപ്പില് അടുത്ത മൂന്ന് മത്സരത്തില് നിന്നെങ്കിലും താരത്തിന് വിട്ടു നില്ക്കേണ്ടിവരും. ഭാരതത്തിനെതിരായ മത്സരത്തിലടക്കം ന്യൂസീലന്ഡ് നായകന് കളിക്കാനാവില്ല.
വെള്ളിയാഴ്ച ബംഗ്ലാദേശിനെതിരെ നടന്ന മത്സരത്തിനിടെ റണ്ണിനായി ഓടുമ്പോഴാണ് വില്ല്യംസണിന്റെ കൈയ്യില് ഏറ് കൊണ്ടത്. 78 റണ്സെടുത്തു നിന്ന താരം ഇതേ തുടര്ന്ന് റിട്ടയേര്ഡ് ഹര്ട്ട് എടുത്തിരുന്നു. മത്സരത്തില് ന്യൂസീലന്ഡ് ബംഗ്ലാദേശിനെ എട്ട് വിക്കറ്റിന് തോല്പ്പിച്ചു. കഴിഞ്ഞ ഐപിഎല്ലിനിടെ പരിക്കേറ്റ വില്ല്യംസണ് മാസങ്ങളായി വിശ്രമത്തിലായിരുന്നു. ലോകകപ്പ് ആരംഭിച്ച് ആദ്യ രണ്ട് മത്സരങ്ങളില് കളിച്ചിരുന്നില്ല. മൂന്നാം മത്സരത്തില് ബംഗ്ലാദേശിനെതിരെ ഇറങ്ങിയപ്പോളാണ് വീണ്ടും പരിക്കേറ്റിരിക്കുന്നത്.
