ബംഗ്ലാദേശിനെ തകര്‍ത്ത് തരിപ്പണമാക്കി ഇംഗ്ലണ്ട്

ധര്‍മ്മശാല : ഏകദിന ലോകകപ്പില്‍ ബംഗ്ലാദേശിനെ തകര്‍ത്ത് ഇംഗ്ലണ്ട്.ഇംഗ്ലണ്ട് 137 റണ്‍സിന്റെ വിജയമാണ് നേടിയത്.

ഇംഗ്ലണ്ട് പടുത്തുയര്‍ത്തിയ 365 എന്ന വിജയ ലക്ഷ്യം പിന്തുടര്‍ന്ന ബംഗ്ലാദേശ് 48.2 ഓവറില്‍ 227 റണ്‍സിന് എല്ലാവരും പുറത്തായി. 66 പന്തില്‍ നിന്ന് 76 റണ്‍സ് എടുത്ത ലിറ്റണ്‍ ദാസും 51 റണ്‍സ് നേടി മുഷ്ഫിഖര്‍ റഹീമും മാത്രമാണ് ബംഗ്ലാദേശിനായി തിളങ്ങിയത്.

ഇംഗ്ലണ്ടിന് വേണ്ടി റീസ് ടോപ്ലി 10 ഓവറില്‍ 43 റണ്‍സ് വഴങ്ങി നാല് വിക്കറ്റെടുത്തു. വോക്‌സ്, രണ്ട് വിക്കറ്റും ആദില്‍ റഷീദ്,വുഡ്, സാം കുറന്‍, ലിവിങ്‌സ്റ്റോണ്‍ എന്നിവര്‍ ഒരോ വിക്കറ്റും നേടി.

ആദ്യം ബാറ്റു ചെയ്ത ഇംഗ്ലണ്ട് 9 വിക്കറ്റ് നഷ്ടത്തില്‍ 364 റണ്‍സെന്ന കൂറ്റന്‍ സ്‌കോറാണ് പടുത്തുയര്‍ത്തിയത്. ഓപ്പണര്‍മാരായ ജോണി ബൈര്‍‌സ്റ്റോയും ദാവിദ് മലനും ചേര്‍ന്ന് ഒന്നാം വിക്കറ്റ് കൂട്ടുകെട്ടില്‍ 115 റണ്‍സാണ് നേടിയത്. 52 റണ്‍സ് നേടി ബൈര്‍‌സ്റ്റോയാണ് ആദ്യം പുറത്തായത്. തുടര്‍ന്ന് മലനും ജോ റൂട്ടും ചേര്‍ന്ന് രണ്ടാം വിക്കറ്റിന് 156 റണ്‍സ് കൂട്ടിചേര്‍ത്തു.