ലഖ്നൗ:ശ്രീരാമന്റെ ത്യാഗപൂര്ണ്ണവും ആദര്ശപൂര്ണ്ണവുമായ ജീവിതത്തെ പ്രതിഫലിപ്പിക്കുന്ന 290 തൂണുകള് രാജ്യമൊട്ടാകെ സ്ഥാപിക്കുമെന്ന് ശ്രീരാമജന്മഭൂമി ട്രസ്റ്റ് സെക്രട്ടറി ചമ്പത് റായ്. അയോദ്ധ്യ മുതൽ രാമേശ്വരം വരെ 290 ശ്രീരാമ സ്തംഭങ്ങളാകും സ്ഥാപിക്കും.
ഇതില് ഒരു തൂണ് ശബരിമലയില് സ്ഥാപിക്കും. അതിന് പിന്നില് ഒരു ഐതിഹ്യമുണ്ട്. ശ്രീരാമനെ ശബരി കണ്ടുമുട്ടിയ വനമാണ് ശബരിമലയെന്നതാണ് ആ കഥ. അതുകൊണ്ടാണ് ശബരിമലയില് ശ്രീരാമന്റ ഓര്മ്മയ്ക്കായുള്ള തൂൺ സ്ഥാപിക്കുക. രാമായണത്തില് ശബരിയെ ഒരു ഗോത്രവര്ഗ്ഗത്തില്പ്പെട്ട ശ്രീരാമ ഭക്തനായാണ് വിശേഷിപ്പിക്കുന്നത്. ശ്രീരാമനും സഹോദരന് ലക്ഷ്മണനും സീതയെ വീണ്ടെടുക്കാന് രാവണനുമായി യുദ്ധത്തിന് ലങ്കയിലേക്ക് പോകുമ്പോഴാണ് വഴിയില് ശ്രീരാമഭക്തനായ ശബരിയെ കാണുന്നത്. ഈ വനം ശബരിമലയാണെന്ന് രാമയണത്തില് പറയുന്നു.
വനവാസക്കാലത്ത് വനത്തിനുള്ളില് യാത്ര ചെയ്യുന്നതിനിടയില് രാമൻ സന്ദർശിച്ച എല്ലാ സ്ഥലങ്ങളെയുമാകും തൂണുകൾ അടയാളപ്പെടുത്തുക. വാല്മീകി രാമായണത്തില് ആ പ്രദേശത്തെക്കുറിച്ച് എന്താണോ സൂചിപ്പിച്ചിരിക്കുന്നത് അതായിരിക്കും ആ കല്തൂണില് എഴുതുക.
വരും തലമുറയ്ക്ക് ശ്രീരാമന്റെ ജീവിതത്തെക്കുറിച്ച് ഉള്ക്കാഴ്ച നല്കുകയാണ് ലക്ഷ്യം. ഇതിനായി സര്ക്കാരില് നിന്നും ഒരു പൈസ പോലും വാങ്ങില്ലെന്നും എല്ലാ ചെലവും അശോക് സിംഘാള് ഫൗണ്ടേഷന് വഹിക്കുമെന്നും ചമ്പത് റായ് പറഞ്ഞു.
അയോദ്ധ്യയിലെ മണിപർബത്തിലാകും ആദ്യ തൂൺ സ്ഥാപിക്കുക. രാമക്ഷേത്ര നിർമ്മാണത്തിനായി ഉപയോഗിക്കുന്ന പിങ്ക് മണൽക്കല്ലിൽ കൊത്തിയെടുത്ത ആദ്യ പ്രതിഷ്ഠ 27-ന് നടക്കുമെന്ന് അധികൃതർ അറിയിച്ചു. എഎൻഐയാണ് വാർത്ത റിപ്പോർട്ട് ചെയ്തത്.
തൂണുകൾ സ്ഥാപിക്കുന്ന സ്ഥലങ്ങൾ മുൻ ഇന്ത്യൻ റവന്യൂ ഓഫീസർ രാം അവതാർ ശർമ്മ പരിശോധിച്ചു.ഓരോ തൂണിലും വാൽമീകി രാമായണത്തിലെ ഈരടികൾ ഉണ്ടായിരിക്കും. തെലങ്കാനയിലെ തുംഗഭദ്ര നദിയുടെ തീരത്തും തൂണുകൾ സ്ഥാപിക്കും. നദിയുടെ തീരത്തുള്ള അനെഗുഡി എന്ന ചെറുപട്ടണം പുരാതനകാലത്ത് കിഷ്കിന്ധ എന്നാണ് അറിയപ്പെട്ടിരുന്നത്. ഇവിടെയാണ് ശ്രീരാമൻ ആദ്യമായി ഹനുമാനെയും സുഗ്രീവനെയും കാണുന്നത്. മറ്റൊന്ന് ധനുഷ്കോടിയിലെ രാമസേതുവിലും സ്ഥാപിക്കും.
