വയനാട്: കോഴിക്കോട് നിപ സ്ഥിരീകരിച്ച സാഹചര്യത്തിൽ തൊട്ടടുത്ത ജില്ലയായ വയനാട്ടിലും കൺട്രോൾ റൂം ആരംഭിച്ചു. ജില്ലയിൽ രോഗപ്രതിരോധവും നിരീക്ഷണവും ആരോഗ്യവകുപ്പ് ശക്തമാക്കി. ഇതിനോടനുബന്ധിച്ച് 24 മണിക്കൂറും പ്രവർത്തിക്കുന്ന കൺട്രോൾ റൂമാണ് സജ്ജമാക്കിയിരിക്കുന്നത്.
രോഗ പ്രതിരോധപ്രവർത്തങ്ങൾക്കും സർവൈലൻസിന് നേതൃത്വം നൽകുന്നതിനും അടിയന്തര സാഹചര്യങ്ങളുണ്ടായാൽ ഫലപ്രദമായി നേരിടുന്നതിനുമാണ് നീക്കം. ഇതിന്റെ ഭാഗമായി ജില്ലയിലെ പ്രോഗ്രാം ഓഫീസർമാരെയും എല്ലാം ഉൾപ്പെടുത്തി 15 കോർ കമ്മിറ്റികളും രൂപവത്കരിച്ചിട്ടുണ്ട്. നിലവിൽ ജില്ലയിൽ ആശങ്കപ്പെടേണ്ട സാഹചര്യം ഇല്ലെന്നും രോഗം സ്ഥിരീകരിച്ചവരുമായി ഏതെങ്കിലും രീതിയിൽ സമ്പർക്കം ഉണ്ടായിട്ടുള്ളവരാണെങ്കിൽ ആരോഗ്യവകുപ്പിനെ വിവരമറിയിക്കണമെന്നും അധികൃതർ വ്യക്തമാക്കി.
