പുതുക്കാട്: പുതുക്കാട് മേഖലയില്‍ ഉപേക്ഷിക്കപ്പെട്ട ബൈക്കുകള്‍ ദുരൂഹതയേറ്റുന്നു. കാഞ്ഞൂരിലും, അളഗപ്പനഗര്‍ പഞ്ചായത്ത് ഹയര്‍ സെക്കണ്ടറി സ്‌കൂള്‍ കോമ്പൗണ്ടിലുമാണ് രണ്ട് ബൈക്കുകള്‍ ഉപേക്ഷിക്കപ്പെട്ട നിലയില്‍ കണ്ടെത്തിയത്.
കാഞ്ഞൂര്‍ മന വഴിയിലാണ് ഒരു ബൈക്ക് കണ്ടെത്തിയത്. KL-8 S 9914 നമ്പറിലുള്ള ഹീറോ ഹോണ്ട സ്‌പ്ലെന്‍ഡര്‍ ബൈക്കാണ് റോഡരികില്‍ കാടുമൂടി കിടക്കുന്നത്. അളഗപ്പനഗര്‍ സ്‌കൂളിന്റെ ശുചിമുറിയോട് ചേര്‍ന്നാണ് മറ്റൊരു ബൈക്ക് മാസങ്ങളായി ഉപേക്ഷിച്ച് പോയിരിക്കുന്നത്. KL-8 P-7586 നമ്പറിലുള്ള ഹീറോ ഹോണ്ട ബൈക്കാണിത്. നാട്ടുകാരും സ്‌കൂള്‍ അധികൃതരും പുതുക്കാട് പോലീസില്‍ വിവരമറിയിച്ചതിനെ തുടര്‍ന്ന് പോലീസ് അന്വേഷണം നടത്തിയെങ്കിലും ഉടമകളെ കണ്ടെത്താന്‍ കഴിഞ്ഞില്ലെന്നാണ് പറയുന്നത്.
ഈ നമ്പറിലുള്ള ബൈക്കുകള്‍ മോഷണം പോയതായ പരാതികള്‍ ലഭിക്കാത്തതും പോലീസിനെ നട്ടംതിരിക്കുകയാണ്. സ്‌കൂളില്‍ ഉപേക്ഷിച്ച ബൈക്കിന്റെ ആര്‍സി ബുക്കിലെ വിലാസം തേടി പോലീസ് അന്വേഷണം നടത്തിയെങ്കിലും ഇവരെ കണ്ടെത്താന്‍ കഴിഞ്ഞില്ലത്രെ. മാല പൊട്ടിക്കല്‍, കഞ്ചാവ് സംഘങ്ങള്‍, മോഷ്ടാക്കള്‍ എന്നിവരാകാം ബൈക്കുകള്‍ കൊണ്ടുവന്ന് ഉപേക്ഷിച്ചതെന്ന നിഗമനത്തിലാണ് പോലീസ്. മോഷ്ടിച്ച് കൊണ്ടുവരുന്ന ബൈക്കുകളില്‍ കറങ്ങി കുറ്റകൃത്യം ചെയ്തശേഷം ബൈക്കുകള്‍ ഉപേക്ഷിച്ച് പോകുന്ന സംഘങ്ങളെയും പോലീസ് സംശയിക്കുന്നുണ്ട്.
എന്നാല്‍ ബൈക്കിന്റെ ഉടമകളെ കണ്ടെത്തുന്നതിന് പോലീസ് കാര്യക്ഷമമായ ഇടപെടലുകള്‍ നടത്തുന്നില്ലെന്ന ആക്ഷേപമാണുയരുന്നത്.
