കണ്ണൂര്‍ : സ്‌കൂളിലേക്ക് പോകുന്നതിനിടെ പെണ്‍കുട്ടിയെ തട്ടിക്കൊണ്ടുപോകാന്‍ ശ്രമം. കണ്ണൂര്‍ കക്കാട് പള്ളിക്കുന്നിലേക്ക് പോകുന്ന ഇടവഴിയില്‍ വെച്ചാണ് സംഭവം. കാറിലെത്തിയ നാലംഗ സംഘം പെണ്‍കുട്ടിയെ പിടികൂടി വാഹനത്തില്‍ കയറ്റാന്‍ ശ്രമിക്കുകയായിരുന്നു. പെണ്‍കുട്ടി അവിടെ നിന്നും ഓടി രക്ഷപ്പെട്ടു.
ബുധനാഴ്ച രാവിലെയാണ് സംഭവം. ഇടവഴിയിലൂടെ സ്‌കൂളിലേക്ക് പോകുന്നതിനിടെയാണ് തട്ടിക്കൊണ്ടുപോകാന്‍ ശ്രമം നടത്തിയത്. സ്‌കൂള്‍ യൂണിഫോമിലായിരുന്നു പെണ്‍കുട്ടി. ഈ സമയം വഴിയില്‍ ആളുകളാരും ഉണ്ടായിരുന്നില്ല. മുഖംമൂടി ധരിച്ച് കാറിലെത്തിയ സംഘം പെണ്‍കുട്ടിയെ വലിച്ച് കാറിലേക്ക് കയറ്റാന്‍ ശ്രമിച്ചു.
അവിടെ നിന്നും പെണ്‍കുട്ടി കുതറി ഓടി രക്ഷപ്പെട്ടു. ഇതിനിടെ എതിര്‍ ദിശയില്‍ ഓട്ടോറിക്ഷ വരുന്നത് കണ്ട് കാര്‍ തിരികെ പോയി. പകച്ചോടിയ പെണ്‍കുട്ടി സമീപത്തെ കടയില്‍ അഭയം തേടി. പെണ്‍കുട്ടിയുടെ പരിഭ്രാന്തി കണ്ട് കടയുടമ സമാധാനിപ്പിച്ച് വിവരം ചോദിക്കുകയായിരുന്നു. സംഭവത്തില്‍ പോലീസ് അന്വേഷണം ആരംഭിച്ചു. സ്ഥലത്തെത്തി സിസിടിവി ദൃശ്യങ്ങളും ശേഖരിച്ചിട്ടുണ്ട്.
പ്രദേശത്ത് ഇതിന് മുമ്പും ഒമ്‌നി കാറിലെത്തിയ സംഘം സ്‌കൂളിലേക്ക് പോയ കുട്ടിയെ തട്ടിക്കൊണ്ടുപോകാന്‍ ശ്രമിച്ചതായി നാട്ടുകാര്‍ ആരോപിച്ചു. മൂന്ന് ദിവസം മുമ്പ് ഒരു ആണ്‍കുട്ടിയെ കക്കാട് നിന്ന് കാണാതായെന്നും പരാതിയുണ്ട്.
