മംഗലപുരം: ശാസ്തവട്ടത്ത് തെരുവുനായ ആക്രമണത്തിൽ യുവാവിന് പരിക്കേറ്റു. പോത്തൻകോട് വാവറഅമ്പലം അഭിലാഷ് ഭവനിൽ അഭിലാഷ്(30) നാണ് കടിയേറ്റത്. ശനിയാഴ്ച രാവിലെ ഒൻപതു മണിയ്‌ക്കാണ് സംഭവം.
ഓൺലൈൻ സാധനങ്ങളുടെ വിതരണക്കാരനായ അഭിലാഷ് കമ്പനിയിൽ പോയി ബാഗിൽ സാധനങ്ങളുമായി മടങ്ങി വരുമ്പോഴാണ് തെരുവുനായ ആക്രമിച്ചത്. പുറകിൽ തൂക്കിയിട്ടിരുന്ന ബാഗിൽ തെരുവുനായ കടിക്കുകയും അഭിലാഷ് ബൈക്കിൽ നിന്നും നിലത്തു വീഴുകയായിരുന്നു. അതേ സമയം തന്നെ അഭിലാഷിന്റെ വലതു കാലിൽ തെരുവുനായ കടിച്ചു. ഇതു കണ്ട് ബൈക്ക് നിർത്തി രക്ഷിക്കാനെത്തിയ മറ്റൊരു യുവാവിനെയും തെരുവുനായ ആക്രമിച്ചു. അഭിലാഷ് ആറ്റിങ്ങൽ വലിയകുന്ന് ആശുപത്രിയിൽ ചികിത്സതേടി.
