പുതുക്കാട്: തൃക്കൂര്‍ ആലേങ്ങാട് പ്രദേശത്ത് ലഹരി മാഫിയ സംഘങ്ങളുടെ അഴിഞ്ഞാട്ടം. പട്ടാപ്പകല്‍ ഏഴാം ക്ലാസ് വിദ്യാര്‍ത്ഥിനിയെ നടുറോഡില്‍ വെച്ച് അധിഷേപിച്ച ഏഴംഗ സംഘം പോലീസ് നിരീക്ഷണത്തില്‍. കഴിഞ്ഞ ദിവസം ഉച്ചതിരിഞ്ഞ് ആലേങ്ങാട് വെച്ചാണ് സംഭവം.
ബൈക്കുകളിലെത്തിയ സംഘം വിദ്യാര്‍ത്ഥിനിയെ റോഡില്‍ വെച്ച് കളിയാക്കുകയായിരുന്നു. കുട്ടി ഇക്കാര്യം വീട്ടിലറിയിച്ചതറിഞ്ഞ സംഘം ഇവരുടെ വീടിന് നേരെയും അക്രമം നടത്തി. അപായപ്പെടുത്തുമെന്ന ഭീതിയില്‍ വീട്ടുകാര്‍ പോലീസില്‍ പരാതി നല്‍കിയില്ല. നാട്ടുകാര്‍ വിവരമറിയിച്ചതിനെ തുടര്‍ന്ന് പുതുക്കാട് പോലീസ് അന്വേഷണം ശക്തമാക്കി.
സംഭവത്തിന് പിന്നിലുള്ള യുവാക്കളെ കുറിച്ച് പോലീസിന് സൂചന ലഭിച്ചതായാണ് വിവരം. 16 നും 22 നും ഇടയില്‍ പ്രായമുള്ളവരാണ് സംഘത്തിലുള്ളത്. ഇതില്‍ ചിലര്‍ കഞ്ചാവ് ഉപയോഗിക്കുന്നവരാണെന്നും സ്‌പെഷ്യല്‍ ബ്രാഞ്ച് റിപ്പോര്‍ട്ട് ചെയ്തു. ആളൊഴിഞ്ഞ പ്രദേശങ്ങളില്‍ ബൈക്കുകളില്‍ കറങ്ങുന്ന യുവാക്കള്‍ കഞ്ചാവ് ലഹരിയില്‍ അതിക്രമം നടത്തുമെന്ന ആശങ്കയും നാട്ടുകാര്‍ക്കുണ്ട്. സ്‌കൂള്‍ വിട്ട് പോകുന്ന വിദ്യാര്‍ത്ഥികളും ജോലി കഴിഞ്ഞ് മടങ്ങുന്ന സ്ത്രീകളും ഭീതിയിലാണ്.
അപരിചിതരായ യുവാക്കള്‍ പല സ്ഥലങ്ങളില്‍ ബൈക്കുകളില്‍ എത്തുന്നതും നാട്ടുകാരില്‍ സംശയത്തിനിടയാക്കുന്നുണ്ട്. പോലീസിന്റെ പരിശോധന കര്‍ശനമാക്കി ലഹരി സംഘങ്ങളെ പിടികൂടണമെന്നാണ് നാട്ടുകാരുടെ ആവശ്യം. സ്വൈര്യ ജീവിതം തകര്‍ക്കുന്ന ഇത്തരം സംഘങ്ങള്‍ക്കെതിരെ തൃക്കൂര്‍ പഞ്ചായത്ത് അധികൃതര്‍ ഇടപെടണമെന്നും നാട്ടുകാര്‍ ആവശ്യപ്പെട്ടു.
പ്രതികരിക്കാൻ ഇവിടെ എഴുതുക: