ന്യൂദല്‍ഹി: ഇന്ത്യയില്‍ എല്ലാ മതങ്ങളും തുല്യരാണെന്നും നൂറ്റാണ്ടുകളായി സൗഹാര്‍ദ്ദത്തോടെ നിലകൊള്ളുന്ന സംസ്‌കാരങ്ങളും മതങ്ങളും നിലനില്‍ക്കുന്ന രാജ്യത്ത് ഒരു മതവും ഭീഷണി നേരിടുന്നില്ലെന്നും ദേശീയ സുരക്ഷാ ഉപദേഷ്ടാവ് അജിത് ഡോവല്‍.
വിയോജിപ്പുകള്‍ ഉള്‍ക്കൊള്ളാനുള്ള അനന്തമായ ശേഷിയുള്ള വിഭിന്ന ആശയങ്ങളുടെ കേന്ദ്രമെന്ന നിലയില്‍ ഇന്ത്യ അതിന്റെ പങ്ക് തുടരുന്നു. ഒരു മതത്തിനും ഒരു ഭീഷണിയിലും ഇല്ല. ദല്‍ഹിയില്‍ ഇന്ത്യ ഇസ്ലാമിക് കള്‍ച്ചറല്‍ സെന്ററില്‍ നടന്ന പരിപാടിയില്‍ സംസാരിക്കുകയായിരുന്നു അദേഹം.
ആറ് ദിവസത്തെ ഇന്ത്യാ സന്ദര്‍ശനത്തിനെത്തിയ മുസ്ലീം വേള്‍ഡ് ലീഗ് സെക്രട്ടറി ജനറല്‍ ഷെയ്ഖ് ഡോ മുഹമ്മദ് ബിന്‍ അബ്ദുള്‍കരീം അല്‍ ഈസയും സമ്മേളനത്തെ അഭിസംബോധന ചെയ്തു. ഒരു അഭിമാന നാഗരിക രാഷ്‌ട്രമെന്ന നിലയില്‍, നമ്മുടെ കാലത്തെ വെല്ലുവിളികളെ നേരിടാന്‍ സഹിഷ്ണുതയും സഹകരണവും പ്രോത്സാഹിപ്പിക്കുന്നതില്‍ ഇന്ത്യ വിശ്വസിക്കുന്നുവെന്നും അദേഹം പറഞ്ഞു.
200 ദശലക്ഷത്തോളം മുസ്ലീങ്ങള്‍ ഉണ്ടായിരുന്നിട്ടും, ആഗോള ഭീകരതയില്‍ ഇന്ത്യന്‍ പൗരന്മാരുടെ പങ്കാളിത്തം അവിശ്വസനീയമാംവിധം കുറവാണ്. അത് യാദൃശ്ചികമല്ല. ലോകത്തിലെ ഏറ്റവും വലിയ ജനാധിപത്യ രാജ്യവും ജനാധിപത്യങ്ങളുടെ മാതാവുമായ ഇന്ത്യ, അവിശ്വസനീയമായ വൈവിധ്യങ്ങളുടെ നാടാണ്.
സംസ്‌കാരങ്ങളുടെയും മതങ്ങളുടെയും ഭാഷകളുടെയും കൂടിച്ചേരലാണിത്. എല്ലാ പൗരന്മാര്‍ക്കും അവരുടെ മതപരമോ വംശപരമോ സാംസ്‌കാരികമോ ആയ പശ്ചാത്തലങ്ങള്‍ പരിഗണിക്കാതെ എല്ലാവരെയും ഉള്‍ക്കൊള്ളുന്ന ജനാധിപത്യം എന്ന നിലയില്‍ ഇടം നല്‍കുന്നതില്‍ ഇന്ത്യയ്‌ക്ക് വിജയകരമായി കഴിഞ്ഞുവെന്നും അജിത് ഡോവല്‍ പറഞ്ഞു.
ഇന്ത്യയിലെ നിരവധി മതഗ്രൂപ്പുകളില്‍, ഇസ്‌ലാം അഭിമാനത്തിന്റെ അതുല്യവും സുപ്രധാനവുമായ സ്ഥാനം വഹിക്കുന്നു. ലോകത്തിലെ ഏറ്റവും വലിയ രണ്ടാമത്തെ മുസ്‌ലിം ജനസംഖ്യയുള്ള രാജ്യമാണ് ഇന്ത്യ. ഇന്ത്യയിലെ മുസ്ലീം ജനസംഖ്യ എന്നത് ഓര്‍ഗനൈസേഷന്‍ ഓഫ് ഇസ്ലാമിക് കോര്‍പ്പറേഷന്റെ 33ലധികം അംഗരാജ്യങ്ങളുടെ സംയോജിത ജനസംഖ്യയ്‌ക്ക് ഏതാണ്ട് തുല്യമാണെന്നും ഡോവല്‍ കൂട്ടിച്ചേര്‍ത്തു.
