ആലപ്പുഴ: സിവില് സ്റ്റേഷനിലെ വിവിധ സര്ക്കാര് ഓഫീസുകളില് ഡ്രൈ ഡേ ആചരിച്ചു. മാലിന്യം വലിച്ചെറിയല് മുക്ത കേരളം പദ്ധതിയുടെ ഭാഗമായി ജില്ലയിലെ സര്ക്കാര് ഓഫീസുകളില് ശനിയാഴ്ച ഡ്രൈഡേ ആചരിക്കുന്നതിന് നേരത്തെ തീരുമാനിച്ചിരുന്നു. ഇതിന്റെ ഭാഗമായാണ് ശുചീകരണ പ്രവര്ത്തനങ്ങള് നടത്തിയത്. ജില്ല കളക്ടര് ഹരിത വി. കുമാര് നേതൃത്വം നല്കി.
സിവില് സ്റ്റേഷന് പരിസരത്തെ കാട് വെട്ടി തെളിക്കല്, മാലിന്യം നീക്കം ചെയ്യല് തുടങ്ങിയ പ്രവര്ത്തനങ്ങളാണ് നടന്നത്. ഓഫീസ് പ്രവര്ത്തനത്തെ ബാധിക്കാത്ത തരത്തിലായിരുന്നു ശുചീകരണ പ്രവര്ത്തനങ്ങള്.രാവിലെ എട്ട് മണിക്ക് തന്നെ ജീവനക്കാരെത്തി പ്രവൃത്തികള് ആരംഭിച്ചു.
വിവിധ ഓഫീസുകളിലെ പ്ലാസ്റ്റിക് മാലിന്യങ്ങള്, പേപ്പറുകള്, കുപ്പികള്, ഉപയോഗശൂന്യമായ കമ്പ്യൂട്ടര്, ഇലക്ട്രോണിക് ഉപകരണങ്ങള്, പഴയ ഫയലുകള് തുടങ്ങിയവ പ്രത്യേകം തരം തിരിച്ചു. ശേഖരിച്ച മാലിന്യങ്ങള് നിര്മ്മാര്ജനം ചെയ്യുന്നതിനായി ശുചിത്വ മിഷന്റെ നേതൃത്വത്തില് ക്ലീന് കേരള കമ്പനിയെ ഏല്പ്പിക്കും.
എല്ലാ ശനിയാഴ്കളിലും ഇത്തരത്തില് ഡ്രൈ ഡേ ആചരിക്കും.എഡിഎം എസ്. സന്തോഷ് കുമാര്, വിവിധ വകുപ്പുകളുടെ ജില്ലാതല മേധാവികള്, ജീവനക്കാര് എന്നിവരുടെ നേതൃത്വത്തിലാണ് കളക്ട്രേറ്റ് പരിസരം ശുചീകരിച്ചത്.
