ജക്കാര്‍ത്ത : ഇന്തോനേഷ്യ ഓപ്പണ്‍ വേള്‍ഡ് ടൂര്‍ സൂപ്പര്‍ 1000 ടൂര്‍ണമെന്റ് പുരുഷ ഡബിള്‍സ് സെമിഫൈനലില്‍ കടന്ന് ഇന്ത്യയുടെ സാത്വിക്സായിരാജ് റങ്കിറെഡ്ഡി-ചിരാഗ് ഷെട്ടി സഖ്യം. ഫജര്‍ അല്‍ഫിയാന്‍-മുഹമ്മദ് റിയാന്‍ അര്‍ഡിയാന്റോ സഖ്യത്തെ നേരിട്ടുള്ള ഗെയിമുകള്‍ക്കാണ് തോല്‍പിച്ചത്.
ഏഴാം സീഡായ സാത്വിക്-ചിരാഗ് സഖ്യം 21-13, 21-13 എന്ന സ്‌കോറിനാണ് ടോപ് സീഡ് ഇന്തോനേഷ്യയുടെ അല്‍ഫിയന്‍-അഡ്രിയാന്റോ സഖ്യത്തെ പരാജയപ്പെടുത്തിയത്. മത്സരം 41 മിനിറ്റ് നീണ്ടു നിന്നു.
കൊറിയന്‍ താരങ്ങളായ മിന്‍ ഹ്യൂക്ക് കാങ്-സിയൂങ് ജെ സിയോ, ഇന്തോനേഷ്യയുടെ ലിയോ റോളി കര്‍ണാണ്ടോ-ഡാനിയല്‍ മാര്‍ട്ടിന്‍ എന്നിവര്‍ തമ്മിലുള്ള ക്വാര്‍ട്ടര്‍ ഫൈനല്‍ മത്സരത്തിലെ വിജയിയെ ഫൈനലില്‍ സാത്വിക്കും ചിരാഗും നേരിടും.
മലയാളി താരം എച്ച് എസ് പ്രാണോയും പുരുഷ സിംഗിള്‍സില്‍ സെമിയില്‍ കടന്നു. മൂന്നാം സീഡായ നരോക്കയെ 21-18, 21-6 എന്ന സ്‌കോറിന് അട്ടിമറിച്ചാണ് പ്രണോയ് സെമി ബര്‍ത്ത് ഉറപ്പിച്ചത്.ടോപ് സീഡ് ഡെന്‍മാര്‍ക്കിന്റെ വിക്ടര്‍ ആക്സെല്‍സണും ചൈനീസ് തായ്‌പേയിയുടെ ടിയാന്‍ ചെന്‍ ചൗവും തമ്മിലുള്ള മത്സരത്തിലെ വിജയിയെ പ്രണോയ് സെമിയില്‍ നേരിടും.
