കുമ്പള: പ്രവാസിയുടെ വീട്ടില് വന് കവര്ച്ച. 10 പവന് സ്വര്ണവും കാല് ലക്ഷം രൂപയും കാറും മോഷണം പോയി. കൊടിയമ്മ ഉജാറിലെ ചൂരിത്തടുക്കയിലെ അബൂബക്കറിന്റെ വീട്ടിലാണ് കവര്ച്ച നടന്നത്.
താഴത്തെ നിലയിലെ മൂന്ന് അലമാരകളും മുകളിലത്തെ നിലയിലെ രണ്ട് അലമാരകളും കുത്തി തുറന്ന് വസ്ത്രങ്ങള് വാരിവലിച്ചിട്ട നിലയിലാണ്. താഴത്തെ നിലയിലെ കിടപ്പ് മുറിയില് ഉണ്ടായിരുന്ന താക്കോല് ഉപയോഗിച്ച് അലമാര തുറന്ന് 10 പവന് സ്വര്ണാഭരണങ്ങളും 17,000 രൂപയും രണ്ടാംനിലയിലെ അലമാരയിലുണ്ടായിരുന്ന 8,000 രൂപയുമാണ് കവര്ന്നത്. വീട്ടു മുറ്റത്ത് നിര്ത്തിയിട്ടിരുന്ന, ജമീലയുടെ ഉടമസ്ഥതയിലുള്ള കെഎല് 14 ആര് 4570 സ്വിഫ്റ്റ് കാറുമായാണ് കവര്ച്ചാ സംഘം കടന്ന് കളഞ്ഞത്. വീടിന് സമീപം ഒരു പര്ദ കണ്ടെത്തിയിട്ടുണ്ട്. പുലര്ച്ചെ രണ്ടേ മുക്കാലോടെ അലമാര തുറക്കുന്ന ശബ്ദം കേട്ട് വീട്ടുകാര് ഉണര്ന്നപ്പോഴാണ് കവര്ച്ചാ സംഘം കടന്നത്.
പ്രാഥമിക അന്വേഷണത്തില് വീടിന്റെ വാതിലോ മറ്റോ തകര്ത്തതായി കണ്ടെത്തിയിട്ടില്ല. അതേസമയം ജനലിന്റെ കൊളുത്ത് അകത്ത് നിന്ന് വലിച്ചെടുത്ത നിലയില് കണ്ടെത്തിയിട്ടുണ്ട്. മോഷ്ടാക്കള് നേരത്തെ തന്നെ വീട്ടിനകത്ത് കയറിയിട്ടുണ്ടാവാമെന്നും സംശയിക്കുന്നുണ്ട്. പകല് സമയത്ത് വീട്ടില് ഒളിഞ്ഞുകയറി രണ്ടാംനിലയിലെ ഉപയോഗിക്കാത്ത മുറിയില് കവര്ച്ചാ സംഘം തങ്ങി രാത്രിയോടെ കവര്ച്ച നടത്തിയെന്നാണ് പോലീസ് സംശയിക്കുന്നത്.പരാതിയുടെ അടിസ്ഥാനത്തില് കുമ്പള പോലീസും വിരലടയാള വിദഗ്ധരും ഡോഗ് സ്ക്വാഡും സ്ഥലത്തെത്തി പരിശോധന നടത്തി. പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. കവര്ച്ച നടന്ന വീട്ടില് സിസിടിവി ഇല്ലായിരുന്നു. സമീപത്തെ സിസിടിവികളും പോലീസ് പരിശോധിക്കുന്നുണ്ട്.
