ന്യൂദല്‍ഹി: ഡെറാഡൂണില്‍ നിന്ന് ഡല്‍ഹിയിലേക്കുള്ള വന്ദേ ഭാരത് എക്‌സ്പ്രസിന്റെ കന്നി ഓട്ടം നാളെ (മെയ് 25) രാവിലെ 11 മണിക്ക് പ്രധാനമന്ത്രി നരേന്ദ്ര മോദി ഫ്‌ലാഗ് ഓഫ് ചെയ്യും. ഉത്തരാഖണ്ഡിനായുള്ള ആദ്യ വന്ദേഭാരത് ട്രെയിനാണിത്. വീഡിയോ കോണ്‍ഫറന്‍സിംഗിലൂടെയാണ് പ്രധാനമന്ത്രി പരിപാടിയില്‍ പങ്കെടുക്കുക.
സംസ്ഥാനത്തേക്ക് യാത്ര ചെയ്യുന്ന വിനോദസഞ്ചാരികള്‍ക്ക് ഇത് ലോകോത്തര സൗകര്യങ്ങളോടെ, സുഖപ്രദമായ യാത്രാനുഭവം ന്ല്‍കും. കവച്ച് സാങ്കേതിക വിദ്യ ഉള്‍പ്പെടെയുള്ള നൂതന സുരക്ഷാ സംവിധാനങ്ങളോടെയാണ് ട്രെയിന്‍ തദ്ദേശീയമായി നിര്‍മ്മിച്ചിരിക്കുന്നത്. പൊതുഗതാഗതത്തിന് മാലിന്യ രഹിത മാര്‍ഗങ്ങള്‍ ലഭ്യമാക്കുക എന്ന പ്രധാനമന്ത്രിയുടെ കാഴ്ചപ്പാടില്‍ നയിക്കപ്പെടുന്ന ഇന്ത്യന്‍ റെയില്‍വേ രാജ്യത്തെ റെയില്‍വേ പാതകള്‍ പൂര്‍ണമായും വൈദ്യുതീകരിക്കാനുള്ള ശ്രമത്തിലാണ്.
ഇതിന്റെ ഭാഗമായി പ്രധാനമന്ത്രി ഉത്തരാഖണ്ഡില്‍ പുതുതായി വൈദ്യുതീകരിച്ച റെയില്‍ പാതയുടെ ഭാഗങ്ങള്‍ രാജ്യത്തിന് സമര്‍പ്പിക്കും. ഇതോടെ സംസ്ഥാനത്തെ മുഴുവന്‍ റെയില്‍വേ റൂട്ടുകളും 100% വൈദ്യുതീകരിക്കപ്പെടും. വൈദ്യുതീകരിച്ച ഭാഗങ്ങളില്‍ വൈദ്യുത ട്രാക്ഷന്‍ ഉപയോഗിച്ച് ഓടുന്ന ട്രെയിനുകളുടെ വേഗത വര്‍ദ്ധിപ്പിക്കുകയും ചരക്ക് ശേഷി കൂട്ടുകയും ചെയ്യും.
