അബുദാബി : ഗൾഫിലെ വരാനിരിക്കുന്ന കൊടും ചൂടിൽ നിന്നും ആർക്കെങ്കിലും മഞ്ഞ് മലകൾക്കിടയിലൂടെ ചുറ്റിത്തിരിയണമെന്നുണ്ടോ, എന്നാൽ നിങ്ങൾക്ക് അത്തരത്തിൽ ഒരു അവസരം ഒരുക്കിയിരിക്കുകയാണ് അബുദാബിയിലെ റീം മാൾ. ലോകത്തെ തന്നെ ഏറ്റവും വലിയ ഇൻഡോർ സ്നോ (മഞ്ഞ് ) പാർക്ക് ആണ് മാൾ അധികൃതർ വിനോദ സഞ്ചാരികളുൾപ്പെടെയുള്ളവർക്കായി ഇവിടെ ഒരുക്കിയിരിക്കുന്നത്. ലോക നിലവാരത്തിലുള്ള ഈ പാർക്ക് തീർച്ചയായും ഏവരെയും അദ്ഭുതപ്പെടുത്തുമെന്നതിൽ സംശയമില്ല. ജൂൺ 8 നാണ് പാർക്ക് ജനങ്ങൾക്കായി തുറന്ന് കൊടുക്കുന്നത്.
പതിനായിരം സ്ക്വയർ ഫീറ്ററിലധികം വിസ്തൃതിയിൽ പരന്ന് കിടക്കുന്ന ഈ പാർക്കിൽ വ്യത്യസ്തമാർന്ന പല വിനോദ സംവിധാനങ്ങളാണ് ഒരുക്കിയിരിക്കുന്നത്. പതിനേഴ് മനോഹരമായ കാഴ്ചയിടങ്ങളും ആരെയും ത്രില്ലടിപ്പിക്കുന്ന പന്ത്രണ്ട് സ്നോ റൈഡുകളും പാർക്കിൽ സജ്ജീകരിച്ചിട്ടുണ്ട്. മൈനസ് രണ്ട് ഡിഗ്രിയിലാണ് പാർക്കിന്റെ അന്തരീക്ഷ താപനില ക്രമീകരിച്ചിരിക്കുന്നത്. പാർക്കിലെ ഏറ്റവും വലിയ ആകർഷണം ഐസ് ആൻഡ് ഫ്ലോയിസ് ടെബോ ഗാൻ റേസും ഗ്രന്പ്പുവൽ സമ്മിറ്റ് എസ്കേപ്പുമാണ്.
ഇതിനു പുറമെ എൻട്രി പ്ലാസ, ഫ്ലൈറ്റ് ഓഫ് ദ സ്നോയ് ഔൾ, മാജിക്ക് കാർപ്പെറ്റ്, പോളാർ എക്സ്പ്രസ് ട്രെയിൻ തുടങ്ങിയ റൈഡുകളും കാണികൾക്ക് കൗതുകമാകും. പാർക്കിലെ മറ്റൊരു ആകർഷണം രുചി വൈവിധ്യങ്ങളോടെ ഒരുക്കിയിരിക്കുന്ന ഭക്ഷണശാലകളാണ്. കൂടാതെ ലോഡ്ജ് റസ്റ്റോറന്റ്, ഗ്രറ്റോ അംബി തിയേറ്റർ, ഐസ് കഫേ, പാർട്ടി റും, വിഐപി റും എന്നിവയെല്ലാം പാർക്കിലുണ്ട്. ആരെയും കണ്ണഞ്ചിപ്പിക്കുകയും സാഹസികതയും നിറഞ്ഞ സ്നോ പാർക്ക് ആസ്വദിക്കാൻ ഏവരും തയാറായിക്കോളു എന്നാണ് പാർക്ക് അധികൃതർ ഫേസ് ബുക്കിൽ കുറിച്ചിട്ടത്.
ജന്മഭൂമി ഓണ്‍ലൈന്‍