കൊച്ചി: യുവം പരിപാടിയില് പങ്കെടുത്ത ശേഷം നടന് ഉണ്ണി മുകുന്ദനെ ഹോട്ടല് മലബാര് താജിലേക്ക് ക്ഷണിച്ച് പ്രധാനമന്ത്രി നരേന്ദ്ര മോദി. അരമണിക്കൂറോളം പ്രധാനമന്ത്രിയുമായി സംസാരിച്ചെന്നും തന്റെ ജീവിതത്തിലെ അവിസ്മരണീയ നിമഷങ്ങളായിരുന്നു അതെന്ന് നടന് സോഷ്യല് മീഡിയയില് കുറിച്ചു.
ഉണ്ണിയെ കണ്ടയുടന് ”ഭൈലാ കേം ചോ” (മോനേ എങ്ങനെയുണ്ട്)! ഗുജറാത്തി ഭാഷയില് പ്രധാനമന്ത്രിയുടെ ചോദ്യമായിരുന്നു ആദ്യം. ഗുജറാത്തിഭാഷയില് തന്നെ ഉണ്ണി മറുപടി നല്കി. 24 വര്ഷത്തോളം ഗുജറാത്തില് താമസിച്ചിരുന്ന ഉണ്ണി മുകുന്ദനോട് അവിടത്തെ വിശേഷങ്ങളില് പലതും മോദി പങ്കിട്ടു. ”എന്നെപ്പറ്റി പലകാര്യങ്ങളും മനസ്സിലാക്കിയാണ് അദ്ദേഹം എന്നോടുസംസാരിച്ചത്. എനിക്ക് 13 വയസ്സുള്ളപ്പോഴാണ് മോദിയെ ദൂരെനിന്ന് ആദ്യമായിക്കാണുന്നത്. അന്നു സി.എമ്മായി കണ്ട ആളെ ഇന്ന് പി.എമ്മായി കാണാന് പറ്റിയല്ലോയെന്ന് ഞാന് പറഞ്ഞപ്പോള് നിറഞ്ഞ ചിരിയിലായിരുന്നു അദ്ദേഹം. മാളികപ്പുറം സിനിമയെക്കുറിച്ചും മോദി സംസാരിച്ചു. ഗുജറാത്തില് സിനിമ ചെയ്യാനും ക്ഷണിച്ചു” പ്രധാനമന്ത്രിക്കൊപ്പം ചെലവഴിച്ച നിമിഷങ്ങളെപ്പറ്റി ഉണ്ണി മുകുന്ദന് പറഞ്ഞു.
