കൊച്ചി : ബ്രഹ്‌മപുരത്തെ ബയോമൈനിങ് കരാര്‍ ഏറ്റെടുത്ത കമ്പനി സോണ്ട ഇന്‍ഫ്രോടെക്ക് ആരോപണങ്ങള്‍ ഉയര്‍ന്നതോടെ പ്രതിപക്ഷ നേതാക്കളെ സ്വാധീനിക്കാന്‍ ശ്രമിച്ചതായി ആരോപണം. സോണ്ട ഇന്‍ഫ്രോടെക്ക് എംഡി രാജ്കുമാര്‍ ചെല്ലപ്പന്‍ സ്വാധീനിക്കാന്‍ ശ്രമിച്ചതായി മുന്‍ മേയര്‍ ടോണി ചമ്മണിയാണ് ഇക്കാര്യം വെളിപ്പെടുത്തിയത്.
മലബാറിലുള്ള ഒരു മുന്‍ എംപി യുമായി അടുപ്പമുള്ള നിര്‍മ്മാതാവ് കമ്പനിക്ക് വേണ്ടി ഒന്നരവര്‍ഷം മുമ്പ് സമീപിച്ചതായി ടോണി ചമ്മണി സ്വകാര്യ മാധ്യമത്തോട് വെളിപ്പെടുത്തി. കമ്പനിക്കെതിരെയുള്ള ആരോപണങ്ങളില്‍ നിന്ന് പിന്മാറാനായി എന്തും ചെയ്യാമെന്ന് ഫോണ്‍ വഴി രാജ് കുമാര്‍ ചെല്ലപ്പന്‍ അറിയിച്ചിരുന്നു. എന്നാല്‍ താന്‍ ഉന്നയിച്ചിട്ടുള്ള ആരോപണങ്ങളില്‍ ഉറച്ച് നില്‍ക്കുന്നതായും ജിജെ ഇക്കോ പവര്‍ എന്ന കമ്പനിയുമായി ഒരു ബന്ധവുമില്ല. തന്റെ ആരോപണങ്ങള്‍ക്കെതിരെ നിയമനടപടി എടുക്കാന്‍ സോണ്ട ഇന്‍ഫ്രോടെക്കിനെ വെല്ലുവിളിക്കുന്നുവെന്നും ടോണി ചമ്മണി പറഞ്ഞു. അതേസമയം ജിജെ ഇക്കോ പവര്‍ കമ്പനിക്ക് വേണ്ടി ടോണി ചമ്മണി ഗൂഡാലോചന നടത്തുന്നു എന്നായിരുന്നു രാജ് കുമാര്‍ ചെല്ലപ്പന്‍ പ്രതികരിച്ചത്.
ജൈവ മാലിന്യം സംസ്‌കരിച്ച സ്റ്റാര്‍ കണ്‍സ്ട്രക്ഷന്‍സിന്റെ പ്ലാന്റും ബയോമൈനിങ് നടത്തുന്ന സോണ്ട ഇന്‍ഫ്രോടെക്കും ചട്ടങ്ങള്‍ പാലിച്ചില്ല മാലിന്യം സംസ്‌കരിക്കുന്നത് എന്നാണ് കേന്ദ്ര മലീനീകരണ നിയന്ത്രണ ബോര്‍ഡിന്റെ ആരോപണം. കഴിഞ്ഞ ദിവസം ബ്രഹ്‌മപുരത്ത് നടത്തിയ പരിശോധനയ്‌ക്ക് ശേഷമാണ് ഇക്കാര്യം അറിയിച്ചത്.
