തിരുവനന്തപുരം: തിരുവനന്തപുരം പൂഴനാട് അയ്യപ്പസ്വാമി അന്നദാന മണ്ഡപത്തില് കത്തിച്ചുവച്ച നിലവിളക്കില് നിന്ന് സിഗരറ്റ് കത്തിക്കാന് ശ്രമിച്ച യുവാവിനെ തടഞ്ഞ യുവാവിന് ക്രൂര മര്ദനം. സംഭവത്തില് രണ്ടുപേര് അറസ്റ്റിലായി. അറസ്റ്റിലായവരുടെ കൂടുതല് വിവരങ്ങള് പൊലീസ് പുറത്തുവിട്ടിട്ടില്ല.മണ്ഡപത്തിലുണ്ടായിരുന്ന ശ്രീകുമാര് എന്നയാള്ക്കാണ് മര്ദനമേറ്റത്. പരുക്കേറ്റ ശ്രീകുമാറിനെ നെയ്യാറ്റിന്കരയിലെ ആശുപത്രിയില് പ്രവേശിപ്പിച്ചു.
ശബരിമല തീര്ത്ഥാടനവുമായി ബന്ധപ്പെട്ട് അയ്യപ്പസ്വാമിമാര്ക്കായി സ്ഥാപിച്ച പൂഴനാട് അന്നദാന മണ്ഡപത്തില് പുലര്ച്ചെ നിലവിളക്ക് കത്തിച്ചിരുന്നു. ഈ സമയം അവിടെയെത്തിയ രണ്ട് യുവാക്കള് കത്തിച്ചുവച്ച വിളക്കില് നിന്ന് സിഗരറ്റ് കത്തിക്കാന് ശ്രമിച്ചതാണ് തര്ക്കത്തിനും അക്രമത്തിനും കാരണമായത്. യുവാക്കളെ ശ്രീകുമാര് ചോദ്യം ചെയ്തതോടെ ഇയാളെ സംഘം ചേര്ന്ന് മര്ദിക്കുകയായിരുന്നു. ശ്രീകുമാറിന്റെ നെഞ്ചിനും കൈക്കും തലയ്ക്കും പരുക്കുകളുണ്ട്.
