കൊച്ചി: കൊവിഡ് കാലത്ത് പിപിഇ കിറ്റ് വാങ്ങിയതുമായി ബന്ധപ്പെട്ട കേസില് സർക്കാരിന് ഹൈക്കോടതിയുടെ വിമർശനം. ദുരന്തകാലത്ത് ആര്ക്കും എന്തും ചെയ്യാമെന്ന് കരുതരുത്. അഴിമതിയും സ്വജനപക്ഷപാതവും നടത്താന് ദുരന്തങ്ങള് ആരുംതന്നെ മറയാക്കരുതെന്നും ചീഫ് ജസ്റ്റിസ് അദ്ധ്യക്ഷനായ ബെഞ്ച് വിമർശിച്ചു. കേസിൽ ലോകായുക്ത ഇടപെടലിനെതിരെ നല്കിയ ഹര്ജിയിലാണ് ഹൈക്കോടതി നടപടി.
ആരോഗ്യവകുപ്പ് മുന് പ്രിന്സിപ്പല് സെക്രട്ടറി രാജന് എന്.ഖോബ്രഗഡെ അടക്കമുള്ളവരാണ് കോടതിയെ സമീപിച്ചത്. പരാതി പരിഗണിക്കാൻ ലോകായുക്തയ്ക്ക് അധികാരമുണ്ട്. അന്വേഷണത്തെ എന്തിനു ഭയക്കുന്നുവെന്നും കോടതി ചോദിച്ചു. മുന് ആരോഗ്യമന്ത്രി കെ.കെ.ശൈലജ, അന്നത്തെ ആരോഗ്യ സെക്രട്ടറി രാജന് എന്.ഖോബ്രഗഡെ, മെഡിക്കല് സര്വീസസ് കോര്പറേഷന് എംഡിയായിരുന്ന ബാലമുരളി, മെഡിക്കല് സര്വീസസ് കോര്പറേഷന് മുന് ജനറല് മനേജര് എസ്.ആര്.ദിലീപ് കുമാര്, സ്വകാര്യ കമ്പനി പ്രതിനിധികള് എന്നിവരടക്കം 11 പേര്ക്കെതിരെയാണ് പരാതി.
ഐഎഎസ് ഉദ്യോഗസ്ഥര് അടക്കമുള്ളവര്ക്കാണ് ലോകായുക്ത നോട്ടിസ് അയച്ചത്. പ്രാഥമിക വാദവും അന്വേഷണവും പൂര്ത്തിയായതിനെത്തുടര്ന്നാണു കേസ് ഫയലില് സ്വീകരിച്ചത്. ഡിസംബര് എട്ടിന് ഹാജരാകണമെന്ന് കാണിച്ച് കെകെ ശൈലജയ്ക്ക് ലോകായുക്ത നോട്ടീസ് അയച്ചിരുന്നു.
പിപിഇ അഴിമതിയിൽ കോണ്ഗ്രസ് പ്രവര്ത്തക വീണ എസ്.നായരാണ് ലോകായുക്തയെ സമീപിച്ചത്. പിപിഇ കിറ്റുകള്ക്കു പുറമേ സര്ജിക്കല് ഉപകരണങ്ങള് വാങ്ങിയതിലും അഴിമതി നടന്നതായി പരാതിയില് ആരോപിക്കുന്നു. ചട്ടങ്ങള് പാലിക്കാതെ മരുന്നുകളും ഉപകരണങ്ങളും വാങ്ങിയതിലൂടെ ഖജനാവിനു വലിയ നഷ്ടമുണ്ടായി. മന്ത്രിയായിരുന്ന ശൈലജയുടെ അറിവോടെയാണ് ഇടപാടുകള് നടന്നത്. വിപണി നിരക്കിനെക്കാള് മൂന്നിരട്ടി വിലയ്ക്കാണു സ്വകാര്യ കമ്പനികളില് നിന്നു പിപിഇ കിറ്റുകള് വാങ്ങിയത്. സാധാരണഗതിയില് സാധനങ്ങള് വിതരണം ചെയ്ത ശേഷമാണു പണം അനുവദിക്കുക. കിറ്റുകള് വിതരണം ചെയ്യുന്നതിനു മുന്പു തന്നെ കമ്ബനിക്ക് 9 കോടി രൂപ അനുവദിച്ചതായും പരാതിയില് ചൂണ്ടിക്കാട്ടിയിരുന്നു.
