കണ്ണൂര്‍ :പാനൂരില്‍ വിഷ്ണുപ്രിയയെ കൊലപ്പെടുത്തിയതിന് പിന്നില്‍ പ്രണയ പകയെന്ന് സംശയം. ശ്യാംജിത്തെന്ന മാനന്തേരി സ്വദേശിയാണ് കൊലപ്പെടുത്തിയതെന്നാണ് സംശയം. ഇയാളെ കസ്റ്റഡിയില്‍ എടുത്തതായും റിപ്പോര്‍ട്ടുണ്ട്.
രാവിലെയാണ് പാനൂര്‍ വള്ളിയായില്‍ കണ്ണച്ചാന്‍ കണ്ടി ഹൗസില്‍ വിഷ്ണുപ്രിയയെ (23) വീടിനകത്ത് മരിച്ച് കിടക്കുന്ന നിലയില്‍ കണ്ടെത്തിയത്. തൊട്ടടുത്ത് മരണം നടന്ന കുടുംബവീട്ടില്‍ നിന്ന് രാവിലെ കുളിക്കാനും വസ്ത്രം മാറാനുമായി വീട്ടിലേക്ക് പോയതായിരുന്നു വിഷ്ണുപ്രിയ. മകള്‍ തിരിച്ചെത്താന്‍ വൈകിയതോടെ തിരഞ്ഞുപോയ അമ്മയാണ് മരിച്ച് കിടക്കുന്ന വിഷ്ണുപ്രിയയെ കണ്ടെത്തിയത്.
ബന്ധുക്കളും അയല്‍ക്കാരുമെല്ലാം തറവാട്ട് വീട്ടിലായിരുന്നതിനാല്‍ കൊലപാതകം ആരും അറിഞ്ഞിരുന്നില്ല. സ്ഥലത്ത് പരിശോധന നടത്തിയ പോലീസ് വിഷ്ണുപ്രിയയുടെ ഫോണ്‍ കോളുകള്‍ കേന്ദ്രീകരിച്ച് നടത്തിയ അന്വേഷണത്തില്‍ ശ്യാംജിത്ത് നിരന്തരംഫോണില്‍ ബന്ധപ്പെട്ടിരുന്നതായി കണ്ടെത്തി. ഇതിനെ തുടര്‍ന്നാണ് പോലീസ് യുവാവിനെ കസ്റ്റഡിയില്‍ എടുത്തത്. പ്രണയം നിരസിച്ചതാണ് കൊലപാതകത്തിലേക്ക് നയിച്ചതെന്നാണ് സൂചന. പ്രതി കുറ്റം സമ്മതിച്ചതായും റിപ്പോര്‍ട്ടുകളുണ്ടെങ്കിലും പോലീസ് സ്ഥിരീകരിച്ചിട്ടില്ല.
പാനൂരില്‍ ന്യൂക്ലിയസ് ആശുപത്രിയിലെ ജീവനക്കാരിയായിരുന്നു കൊല്ലപ്പെട്ട വിഷ്ണുപ്രിയ. യുവതിയുടെ അച്ഛന്‍ വിനോദ് ഖത്തറിലാണ്. ഇദ്ദേഹം ഈയടുത്താണ് നാട്ടില്‍ നിന്നും അവധി കഴിഞ്ഞ് തിരികെ പോയത്. കഴുത്ത് അറ്റുതൂങ്ങിയ നിലയിലാണ് വിഷ്ണുപ്രിയയുടെ മൃതദേഹം കണ്ടെത്തിയത്. കൈകളിലും മാരകമായ മുറിവുകളുണ്ട്. കൊലപാതകം നടന്ന സമയത്ത് വീടിന് സമീപത്തു നിന്നും ബാഗും തൊപ്പിയും ധരിച്ച് ഒരു യുവാവ് നടന്ന് പോകുന്നത് കണ്ടതായി നാട്ടുകാര്‍ അറിയിച്ചിരുന്നു. ഇത് കേന്ദ്രീകരിച്ചും പോലീസ് അന്വേഷണം നടത്തിയിരുന്നു.
