ന്യൂദല്ഹി: രാഷ്ട്രപതി തെരഞ്ഞെടുപ്പിന്റെ ഫല പ്രഖ്യാപനം ഇന്നുച്ചയോടെ. രാവിലെ മുതല് പാര്ലമെന്റില് വോട്ടെണ്ണല് ആരംഭിക്കും. എന്ഡിഎ സ്ഥാനാര്ഥി ദ്രൗപദീ മുര്മൂവും പ്രതിപക്ഷ സ്ഥാനാര്ഥി യശ്വന്ത് സിന്ഹയുമാണ് മത്സര രംഗത്ത്. ദ്രൗപദീ മുര്മൂ വിജയമുറപ്പിച്ച വോട്ടെടുപ്പിന്റെ ഔദ്യോഗിക ഫല പ്രഖ്യാപനത്തിനു കാത്തിരിക്കുകയാണ് രാജ്യം. ജൂലൈ 25നു രാഷ്ട്രപതിയുടെ സത്യപ്രതിജ്ഞ. സ്വതന്ത്ര ഇന്ത്യയുടെ പതിനഞ്ചാമത് രാഷ്ട്രപതിയായാണ് അന്ന് അധികാരമേല്ക്കുക.
771 എംപിമാരാണ് രാഷ്ട്രപതി തെരഞ്ഞെടുപ്പില് വോട്ടു രേഖപ്പെടുത്തിയത്. അഞ്ചു പേര് പങ്കെടുത്തില്ല. വിവിധ സംസ്ഥാനങ്ങളില് നിന്നായി 4025 എംഎല്എമാരും വോട്ടു രേഖപ്പെടുത്തി. ആകെ വോട്ടിങ് 99.18 ശതമാനമായിരുന്നു. കേരളം, ഗുജറാത്ത്, കര്ണാടക, മധ്യപ്രദേശ്, തമിഴ്നാട്, ഗോവ, ഛത്തീസ്ഗഡ് തുടങ്ങിയ സംസ്ഥാനങ്ങളില് നൂറു ശതമാനം വോട്ടും രേഖപ്പെടുത്തി. വിവിധ നിയമസഭകളില് നിന്നുള്ള ബാലറ്റു പെട്ടികള് ചൊവ്വ, ബുധന് ദിവസങ്ങളിലായി പാര്ലമെന്റിലെത്തിച്ചു. വരണാധികാരിയായ രാജ്യസഭാ സെക്രട്ടറി ജനറല് പി.സി. മോദിയുടെ നേതൃത്വത്തിലാണ് വോട്ടെണ്ണല്.
