ഇരിട്ടി: ആറളം ഫാമില്‍ കാട്ടാന ചവിട്ടിക്കൊന്ന ഫാം ഏഴാം ബ്ലോക്കിലെ താമസക്കാരനായ പുതുശേരി ദാമൂവിന്റെ മൃതദേഹം സംഭവസ്ഥലത്തുനിന്നും മാറ്റിയത് ഏഴ് മണിക്കൂര്‍ നീണ്ട പ്രതിഷേധത്തിനും പ്രതിരോധത്തിനും ശേഷം. ആദിവാസികളുടെ വന്‍ പ്രതിഷേധമാണ് സംഭവസ്ഥലത്തു നടന്നത്. വിവിധ ഉദ്യോഗസ്ഥര്‍ പ്രതിഷേധവക്കാരുമായി നടത്തിയ ചര്‍ച്ചക്കൊടുവില്‍ വൈകുന്നേരം 5 മണിയോടെയാണ് മൃതദേഹം പോസ്റ്റുമോര്‍ട്ടത്തിനായി ഇവിടെ നിന്നും മാറ്റാനായത്.
വീട്ടിനടുത്ത് കുടുംബക്കാര്‍ക്കൊപ്പം വിറക് ശേഖരിക്കുന്നതിനിടയില്‍ പിന്നില്‍ നിന്ന് എത്തിയ ആന ദാമുവിനെ തുമ്പിക്കൈകൊണ്ട് അടിച്ചു വീഴ്‌ത്തിയ ശേഷം തലയ്‌ക്ക് ചവിട്ടി കൊലപ്പെടുത്തുകയായിരുന്നു. കൂടെയുണ്ടായിരുന്ന ബന്ധുക്കളായ രവി, വിജേഷ്, സിബി എന്നിവര്‍ ഓടി രക്ഷപ്പെട്ടു.
കല്ലുവയല്‍ മാങ്കുഴി സ്വാദേശിയായ ദാമു ആറളം ഫാമില്‍ കെട്ടിട നിര്‍മ്മാണത്തിനാണ് എത്തിയത്. ഏഴാം ബ്ലോക്കില്‍ അമ്മ നാരായണിക്കൊപ്പാമാണ് കഴിഞ്ഞ നാലു വര്‍ഷമായി താമസിക്കുന്നത്. ഭാര്യയും മക്കളും മാങ്കുഴിയിലുമാണ് താമസം. ഇന്നലെ രാവിലെ 11 മണിയോടടുത്തായിരുന്നു സംഭവം. ദാമുവിനെ ആക്രമിച്ച ശേഷം അഞ്ചുമിനുട്ട് നേരം അവിടെ തന്നെ നിലയുറപ്പിച്ച ആന കാട്ടിനുള്ളിലേക്ക് പോയ ശേഷം മാത്രമാണ് കൂടെയുള്ളവര്‍ക്ക് അവിടേക്ക് പ്രവേശിക്കാന്‍ കഴിഞ്ഞത്. രോഷാകുലരായ നാട്ടുകാര്‍ സംഭവസ്ഥലത്തെത്തിയ വനം വകുപ്പ് ജീവനക്കാരെ തടഞ്ഞുവെച്ചു. അപകടസ്ഥലത്തു നിന്നും മൃതദേഹം വീട്ടിന് സമീപത്തേക്ക് നാട്ടുകാര്‍ തന്നെ മാറ്റി. അവിടെ പോളിത്തീന്‍ ഷീറ്റ് വലിച്ചുകെട്ടി സ്ത്രീകളും കുട്ടികളും ഉള്‍പ്പെടെയുള്ളവര്‍ ശക്തമായ പ്രതിഷേധം തീര്‍ത്തു. മന്ത്രിയോ ജില്ലാ കലക്ടറോ എത്തി ഇതിന് പരിഹാരം ഉണ്ടാക്കിയാല്‍ മാത്രമെ മൃതദേഹം പോസ്റ്റ്മോര്‍ട്ടത്തിന് വീട്ടുനല്‍കുകയുള്ളുവെന്ന ആവശ്യമുയര്‍ത്തി. ജനപ്രതിനിധികളും ഉന്നത പോലീസ് ഉദ്ധ്യോഗസ്ഥരും എത്തി നാട്ടുകാരുമായി സംസാരിച്ചെങ്കിലും ഫലമുണ്ടായില്ല.
ഉച്ചക്ക് ശേഷം മൂന്ന് മണിയോടെ ഡിഎഫ്ഒ പി.കാര്‍ത്തിക്ക് സ്ഥലത്തെത്തി കാര്യങ്ങള്‍ വിശദീകരിക്കാന്‍ ശ്രമിച്ചെങ്കിലും പ്രതിഷേധക്കാര്‍ കേള്‍ക്കാന്‍ പോലും തെയ്യാറായില്ല. ഡിവൈഎസ്പിമാരായ സജേഷ് വാഴാളപ്പില്‍, എ.വി. ജോണ്‍ എന്നിവര്‍ നടത്തിയ ശ്രമവും പരാജയപ്പെട്ടു. വൈകുന്നേരവും ജില്ലാകലക്ടര്‍ എത്തണമെന്ന ആവശ്യത്തില്‍ പ്രതിഷേധക്കാര്‍ ഉറച്ചു നിന്നു. അഞ്ചുമണിയോടെ എഡിഎം കെ.കെ. ദിവാകരന്‍, തലശേരി സബ്കലക്ടര്‍ അനുകുമാരി എന്നിവരും സ്ഥലത്തെത്തി. ജില്ലാ പഞ്ചായത്ത് വൈസ് പ്രസിഡന്റ് ബിനോയ് കുര്യന്‍, ബ്ലോക്ക് പഞ്ചായത്ത് പ്രസിഡന്റ് കെ. വേലായുധന്‍ എന്നിവര്‍ക്കൊപ്പം പ്രതിഷേധക്കാരുമായും വിവിധരാഷ്‌ട്രീയ പാര്‍ട്ടി പ്രതിനിധികളുമായും സംസാരിച്ചു. പ്രശ്‌നത്തിന് പരിഹാരമുണ്ടാക്കാന്‍ ജില്ലാ കലക്ടറുടെ സാന്നിധ്യത്തില്‍ ഇന്ന് ഫാമില്‍ ചര്‍ച്ച നടത്താമെന്നും കാട് വെട്ടിതെളിക്കാമെന്നുമുളള ഉറപ്പിന്‍മേല്‍ ആറുമണിയോടെ മൃതദേഹം പോസ്റ്റ് മോര്‍ട്ടത്തിന് വിട്ടുകൊടുക്കുകയായിരുന്നു.
