തിരുവനന്തപുരം: അന്തര്‍ദേശീയ യോഗാദിനാചരണത്തിന്റെ ഭാഗമായി ബിജെപി ജില്ലാ കമ്മിറ്റിയുടെ ആഭിമുഖ്യത്തില്‍ ജില്ലയിലെ ചരിത്രപ്രാമഖ്യമുള്ള 75 കേന്ദ്രങ്ങളില്‍ നാളെ യോഗപരിശീലനം സംഘടിപ്പിക്കുമെന്ന് ജില്ലാപ്രസിഡന്റ് അഡ്വ.വി.വി.രാജേഷ് വാര്‍ത്താസമ്മേളനത്തില്‍ അറിയിച്ചു.
സ്വാതന്ത്ര്യത്തിന്റെ 75 ാം വാര്‍ഷികാഘോഷങ്ങളുടെ പശ്ചാത്തലത്തില്‍ യോഗാദിനത്തില്‍ ഭാരതത്തിലെ 75 പ്രമുഖകേന്ദ്രങ്ങളില്‍ യോഗപരിശീലനം സംഘടിപ്പിക്കുന്നുണ്ട്. കേരളത്തില്‍ ഇത് ശ്രീപത്മനാഭസ്വാമിക്ഷേത്രത്തിനു മുന്നിലാണ്. നാളെ രാവിലെ 6ന് കേന്ദ്രമന്ത്രി വി.മുരളീധരന്‍ യോഗപരിശീലനത്തില്‍ പങ്കെടുക്കും.
ജില്ലാകമ്മിറ്റിയുടെ ആഭിമുഖ്യത്തില്‍ വര്‍ക്കല ജനാര്‍ദ്ദനസ്വാമിക്ഷേത്രം, തോന്നയ്‌ക്കല്‍ ആശാന്‍സ്മാരകം, മഹാത്മജിയുടെ സന്ദര്‍ശനത്താല്‍ അനുഗ്രഹീതമായ വേറ്റിനാട് ഗാന്ധിസ്മാരകം, പോത്തന്‍കോട് ശാന്തിഗിരി ആശ്രമം, അരുവിപ്പുറം ക്ഷേത്രപരിസരം, വെള്ളായണി ക്ഷേത്രപരിസരം തുടങ്ങി 75 കേന്ദ്രങ്ങളിലാണ് യോഗപരിശീലനം സംഘടിപ്പിച്ചിട്ടുള്ളത്. വാര്‍ത്താസമ്മേളനത്തില്‍ ബിജെപി ജില്ലാ സെല്‍ കോഓര്‍ഡിനേറ്റര്‍ നിഷാന്ത് സുഗുണന്‍, മീഡിയല്‍ സെല്‍ കണ്‍വീനര്‍ ആര്‍.എസ്.സമ്പത്ത് തുടങ്ങിയവര്‍ പങ്കെടുത്തു.
