മുംബൈ: സാമ്പത്തിക തട്ടിപ്പുവീരന്‍ സുകേഷ് ചന്ദ്രശേഖർ ഉൾപ്പെട്ട കേസിൽ ബോളിവുഡ് നടി ജാക്വിലിൻ ഫെർണാണ്ടസിന്റെ 7.27 കോടി രൂപയുടെ സ്വത്തുക്കൾ എൻഫോഴ്‌സ്‌മെന്റ് ഡയറക്ടറേറ്റ് കണ്ടുകെട്ടി. 200 കോടിയുടെ കള്ളപ്പണം വെളുപ്പിക്കല്‍ കേസുമായി ബന്ധപ്പെട്ട് സുകേഷ് ചന്ദ്രശേഖര്‍ ഇപ്പോള്‍ തീഹാര്‍ ജയിലില്‍ കഴിയുകയാണ്.
ഒരു ആള്‍മാറാട്ടക്കാരനായാണ് ശ്രീലങ്കന്‍ സ്വദേശിനി കൂടിയായ ബോളിവുഡ് താരം ജാക്വിലിന്റെ ജീവിതത്തിലേക്ക് സുകേഷ് ചന്ദ്രശേഖര്‍ കടന്നുവരുന്നത്. ആഭ്യന്തര മന്ത്രാലയത്തിലെ ഉദ്യോഗസ്ഥന്‍ എന്ന് പറഞ്ഞ് ഇയാള്‍ ജാക്വിലിനെ വ്യാജ കോളും വിളിച്ചിരുന്നു.
സ്ഥിരനിക്ഷേപമായി കൈവശം വെച്ചിരുന്ന 7.27 കോടി രൂപയാണ് ജാക്വിലിനില്‍ നിന്നും ഇഡി കണ്ടുകെട്ടിയത്. ഇതില്‍ 5.71 കോടി സുകേഷ് ജാക്വിലിന് നല്‍കിയ സമ്മാനത്തുകയാണെന്നും ഇഡി പറയുന്നു.
സുകേഷ് ധാരാളം സമ്മാനങ്ങള്‍ ജാക്വിലിന് സമ്മാനിച്ചിരുന്നു. ഇതില്‍ 52 ലക്ഷം രൂപയുടെ കുതിര, മൂന്ന് ജോഡി ഡിസൈനര്‍ ബാഗുകള്‍, ഗുചി, ലൂയ് വുയ്ട്ടന്‍ ആഡംബര പാദരക്ഷകള്‍, നിരവധി ഡയമണ്ട് പതിച്ച ആഭരണങ്ങള്‍, 2 ബ്രേസ്ലെറ്റുകള്‍, ഒരു മിനി കൂപ്പര്‍ കാര്‍ എന്നിവ ഉള്‍പ്പെടുന്നു. ജാക്വിലിന്റെ സഹോദരിയ്‌ക്കും അടുത്ത കുടുംബാംഗങ്ങൾക്കും സുകേഷ് പണം നൽകിയിരുന്നു. ഏകദേശം 1,73,000 ഡോളറാണ് ജാക്വിലിന്റെ കുടുംബത്തിനായി സുകേഷ് ചെലവാക്കിയത്
രാഷ്‌ട്രീയപ്രവർത്തകൻ ടിടിവി ദിനകരനെയും തട്ടിപ്പിനിരയാക്കാന്‍ സുകേഷ് ചന്ദ്രശേഖര്‍ ശ്രമം നടത്തി. 50 കോടി രൂപ നല്‍കിയാല്‍ രണ്ടില എന്ന ചിഹ്നം വാങ്ങിത്തരാമെന്ന വാഗ്ദാനമാണ് സുകേഷ് ചന്ദ്രശേഖര്‍ ടിടിവി ദിനകരന് നല്‍കിയത്. ഈ കേസില്‍ പ്രതിയാണ്. കഴിഞ്ഞ വർഷം ഡൽഹിയിലെ ഒരു വ്യവസായിയുടെ ഭാര്യയിൽ നിന്നും 215 കോടി തട്ടിയ കേസിലും സുകേഷിനെ ഇഡി അറസ്റ്റ് ചെയ്തിരുന്നു. .
മലയാളിയായ തട്ടിപ്പുകാരി ലീന മരിയാ പോളിനെ സുകേഷ് ചന്ദ്രശേഖര്‍ വിവാഹം ചെയ്തിട്ടുണ്ട്. 200 കോടിയുടെ കള്ളപ്പണം വെളുപ്പിക്കല്‍ പദ്ധതി ദല്‍ഹിയിലെ രോഹിണി ജയിലിനുള്ളിലിരുന്നാണ് സുകേഷ് ചന്ദ്രശേഖര്‍ ആസൂത്രണം ചെയ്തത്. അന്ന് പുറത്ത് അതിന് മുഖ്യകരുനീക്കം നടത്തിയത് ലീന മരിയ പോള്‍ ആയിരുന്നു.
