ഗാസിയാബാദ് : വിവാഹസല്‍ക്കാരത്തിനായി തയ്യാറാക്കിയ ഭക്ഷണത്തില്‍ പാചകക്കാരന്‍ തുപ്പുന്നതിന്റെ വീഡിയോ വൈറലാവുകയാണ്. ഉത്തര്‍പ്രദേശിലെ മോദി നഗറില്‍ ഒരു വിവാഹസല്‍ക്കാരച്ചടങ്ങിലാണ് ഈ സംഭവം.
തന്തൂരി നാന്‍ ചുടാന്‍ തയ്യാറെടുക്കുന്ന പാചകക്കാരന്‍ പണി തുടങ്ങുന്നതിന് തൊട്ടു മുമ്പാണ് റൊട്ടി ചുടാനുള്ള മാവില്‍ തുപ്പുന്നത്. രണ്ട് മിനിറ്റ് 20 സെക്കന്റ് ദൈര്‍ഘ്യമുള്ള ഈ വീഡിയോ വൈറലാണ്.
പാചകക്കാരന്‍ ആദ്യം മാവില്‍ തുപ്പുന്നത് കാണാം. പിന്നീടാണ് ആ മാവ് കുഴച്ച് റൊട്ടി തയ്യാറാക്കുന്നത്. വീഡിയോ തീരെ വെളിച്ചമില്ലാത്ത സാഹചര്യത്തില്‍ ഷൂട്ട് ചെയ്തതിനാല്‍ സൂക്ഷിച്ച് നോക്കിയാലേ തുപ്പുന്നത് കാണാന്‍ സാധിക്കൂ.
എംഎസ്ബി ന്യൂസ് എന്ന മാധ്യമക്കമ്പനിയാണ് ഈ വീഡിയോ പങ്കുവെച്ചിരിക്കുന്നത്. വീഡിയോടൊപ്പം അവര്‍ ഗാസിയാബാദ് പൊലീസ്, യുപി പൊലീസ്, യുപി വൈറല്‍ ചെക് എന്നിവര്‍ക്കും ടാഗ് ചെയ്തിട്ടുണ്ട്.
സംഭവം സ്ഥിരീകരിച്ച ഗാസിയാബാദ് പൊലീസ് ട്വീറ്റില്‍ ഇക്കാര്യം വ്യക്തമാക്കി:’മോദി നഗര്‍ ടൗണിന്റെ ചുമതലയുള്ള ഇന്‍സ്‌പെക്ടര്‍ ഇക്കാര്യത്തില്‍ ഉചിതമായ നടപടി സ്വീകരിക്കും. ജില്ലയില്‍ പാചകം ചെയ്യാന്‍ പോകുന്നതിന് മുന്‍പ് അതില്‍ തുപ്പുന്ന സംഭവം ഇതാദ്യമല്ലെന്ന് ഗാസിയാബാദ് പൊലീസ് പറയുന്നു.
