കൊച്ചി: നടിയെ ആക്രമിച്ച കേസുമായി ബന്ധപ്പെട്ട് ക്രൈംബ്രാഞ്ച് സംഘം കോടതിയില് നല്കിയ നിര്ണായക ശബ്ദരേഖ പുറത്ത്. ദിലീപിന്റെ അഭിഭാഷകനും സഹോദരന് അനൂപും തമ്മിലുള്ള സംഭാഷണമാണ് പുറത്തുവന്നിരിക്കുന്നത്. വിചാരണ വേളയില് കോടതിയില് നല്കേണ്ട മൊഴികള് എങ്ങനെ വേണമെന്ന് അഭിഭാഷകന് അനൂപിന് പറഞ്ഞുകൊടുക്കുന്നതാണ് ഈ ശബ്ദരേഖയിലുള്ളത്. കേസിലെ പ്രോസിക്യൂഷന് സാക്ഷിയാണ് അനൂപ്.
ദിലീപിന്റെ മുന് ഭാര്യയും നടിയുമായ മഞ്ജു വാര്യര് മദ്യപിക്കാറുണ്ടെന്ന് മൊഴി നല്കണമെന്നാണ് അഭിഭാഷകന് അനൂപിനോട് പറഞ്ഞത്. മഞ്ജു മദ്യപിക്കാറുണ്ടോയെന്ന് അഭിഭാഷകന് ചോദിക്കുമ്പോള് തനിക്ക് അറിയില്ലെന്നും കണ്ടിട്ടില്ലെന്നുമാണ് അനൂപ് പറഞ്ഞത്. എന്നാല് മഞ്ജു മദ്യപിക്കുമെന്ന് കോടതിയില് മൊഴി നല്കാന് അഭിഭാഷകന് പറഞ്ഞു.
വീട്ടില്നിന്ന് പോകുന്നതിന് മുമ്പ് മഞ്ജു സ്ഥിരം മദ്യപിക്കാറുണ്ടെന്ന് കോടതിയില് പറയണം എന്ന് അഭിഭാഷകന് പറഞ്ഞു. പലവട്ടം മദ്യപിച്ച് വീട്ടില് വന്നിട്ടുണ്ടെന്ന് മൊഴി നല്കണം. വീട്ടില് എല്ലാവര്ക്കും അത് അറിയാം. ഇക്കാര്യം ചേട്ടനുമായി സംസാരിച്ചപ്പോള് എല്ലാം നോക്കാമെന്നാണ് ചേട്ടന് പറഞ്ഞത്. ഇത് സംബന്ധിച്ച് ചേട്ടനും ഭാര്യയും തമ്മില് ഞങ്ങളുടെ മുന്നില്വെച്ച് തര്ക്കമുണ്ടായിട്ടില്ലെന്നും പറയണം. പത്തുവര്ഷത്തില് കൂടുതലായിട്ട് ചേട്ടന് മദ്യം തൊടാറില്ലെന്നും പറയണമെന്ന് അഭിഭാഷകന് അനൂപിന് നിര്ദ്ദേശം നല്കി.
ദിലീപിന് ശത്രുക്കള് ഉണ്ട് എന്ന് കോടതിയില് പറയണം. ശ്രീകുമാര് മേനോനും ലിബര്ട്ടി ബഷീറും ശത്രുവാണെന്ന് പറയണം. ശ്രീകുമാര് മേനോനും മഞ്ജു വാര്യരും തമ്മില് അടുപ്പമുണ്ടെന്നും പറയണം. ഗുരുവായൂരിലെ ഡാന്സ് പ്രോഗ്രാമിന്റെ പേരില് വീട്ടില് വഴക്കുണ്ടായെന്ന് പറയണമെന്ന് ശബ്ദരേഖയില് അഭിഭാഷകന് നിര്ദ്ദേശം നല്കുന്നുണ്ട്.
നടി ആക്രമിക്കപ്പെട്ട ദിവസം ദിലീപ് ആശുപത്രിയില് അഡ്മിറ്റായിരുന്നു എന്ന വാദത്തിന് നല്കേണ്ട മൊഴിയും പഠിപ്പിച്ച് കൊടുക്കുന്നുണ്ട്. സംഭവം നടന്ന ദിവസം ദിലീപിന് പനിയും തൊണ്ടവേദനയും ചുമയും ഉണ്ടായിരുന്നു. ദിലീപിനെ ആശുപത്രിയില് പോയി കാണുകയായിരുന്നു പതിവ്. ഇനി എന്തെങ്കിലും ചോദിച്ചാല് ചോദ്യം മനസിലായില്ലെന്ന് പറഞ്ഞാല് മതി എന്നാണ് അഭിഭാഷകന് അനൂപിനോട് പറയുന്നത്. കേസിലെ പ്രോസിക്യൂഷന് സാക്ഷിയാണ് അനൂപ്.
നടിയെ ആക്രമിച്ച കേസിലെ അന്വേഷണ ഉദ്യോഗസ്ഥരെ അപായപ്പെടുത്താന് ഗൂഢാലോചന നടത്തിയ കേസിലെ എഫ്ഐആര് റദ്ദാക്കണമെന്ന ദിലീപിന്റെ ഹര്ജി ഹൈക്കോടതി തള്ളിയിട്ടുണ്ട്. കേസ് വ്യാജമാണെന്നും, ഒരു വീട്ടിലിരുന്ന് സംസാരിച്ചാല് അത് വധഗൂഢാലോചനയാകില്ലെന്നും തന്നെ വേട്ടയാടാനായി കെട്ടിച്ചമച്ച കേസാണെന്നും പറഞ്ഞാണ് ദിലീപ് ഹൈക്കോടതിയെ സമീപിച്ചത്. എന്നാല് കേസിന്റെ മെറിറ്റിലേക്ക് കടക്കാന് വിസമ്മതിച്ച ഹൈക്കോടതി, കേസിലെ എഫ്ഐആര് റദ്ദാക്കില്ലെന്നും വ്യക്തമാക്കി. നടിയെ ആക്രമിച്ച കേസിലെ അന്വേഷണം തുടരാമെന്ന് പ്രത്യേക സംഘത്തിന് ഹൈക്കോടതി നിര്ദ്ദേശം നല്കി. അന്വേഷണ ഉദ്യോഗസ്ഥരെ അപായപ്പെടുത്താന് ഗൂഢാലോചന നടത്തിയെന്ന കേസിലാണ് അന്വേഷണം തുടരാമെന്ന് അറിയിച്ചത്.
