കൊച്ചി : നടിയെ ആക്രമിച്ച കേസുമായി ബന്ധപ്പെട്ട് ദിലീപ് അടക്കമുള്ള പ്രതികളുടെ ശബ്ദ സാമ്പിള് മഞ്ജു തിരിച്ചറിഞ്ഞു. മഞ്ജു വാര്യരെ ചോദ്യം ചെയ്തപ്പോഴാണ് തിരിച്ചറിഞ്ഞത്. ക്രൈംബ്രാഞ്ച് മഞ്ജുവിന്റെ മൊഴിയും രേഖപ്പെടുത്തി. 2012 മുതല് ആക്രമിക്കപ്പെട്ട നടിയുമായി ദിലീപിനുണ്ടായിരുന്ന പ്രശ്നങ്ങള് സംബന്ധിച്ചും മഞ്ജു വെളിപ്പെടുത്തി.
ഒരു പെണ്ണിനെ രക്ഷിക്കാന് ശ്രമിച്ചതിനാണ് താന് ഈ ശിക്ഷ അനുഭവിക്കുന്നതെന്ന ദിലീപിന്റെ ഓഡിയോ അടക്കം ബാലചന്ദ്രകുമാര് അന്വേഷണ സംഘത്തിന് കൈമാറിയ ഓഡിയോകള് സ്ഥിരീകരിക്കുന്നതിനാണ് മഞ്ജു വാര്യരുടെ മൊഴിയെടുത്തത്. കഴിഞ്ഞ ദിവസം പ്രത്യേക സംഘം ഡിവൈഎസ്പി ബൈജു പൗലോസിന്റെ നേതൃത്വത്തിലാണ് നടപടി. ദിലീപിന് പുറമെ അനൂപ്, സുരാജ് അടക്കമുള്ളവരുടെയും ശബ്ദം മഞ്ജു തിരിച്ചറിഞ്ഞിട്ടുണ്ട്.
ബാലചന്ദ്രകുമാര് ഹാജരാക്കിയതില് രണ്ട് ശബ്ദമൊഴി മറ്റൊന്നും തന്റേതല്ലെന്നായിരുന്നു ദിലീപ് മൊഴി നല്കിയത്. ഇക്കാര്യം മഞ്ജു വാര്യര് തള്ളിയിട്ടുണ്ട്. നടിയെ ആക്രമിച്ച കേസില് ഇപ്പോള് പുറത്ത് വന്ന ഡിജിറ്റല് തെളിവുകളിലും മഞ്ജുവില് നിന്ന് വ്യക്തത തേടിയിട്ടുണ്ട്. അതേസമയം കേസില് കാവ്യാമാധവനെ ചോദ്യം ചെയ്യുന്നത് സംബന്ധിച്ച് അന്വേഷണ സംഘം ഇന്ന് തീരുമാനമെടുക്കും. കാവ്യാ മാധവനില് നിന്നും നിര്ണ്ണായക വിവരങ്ങള് ലഭിക്കുമെന്ന പ്രതീക്ഷയിലാണ് അന്വേഷണ സംഘം. കേസിലെ ഗൂഡാലോചനയെക്കുറിച്ച് കാവ്യയ്ക്ക് എല്ലാം അറിയാമെന്നാണ് ബാലചന്ദ്ര കുമാര് അടക്കം ഉള്ളവരുടെ മൊഴികള്.
