തിരുവനന്തപുരം: തമിഴ്നാട്ടിൽ നിന്നും കേരളത്തിലേക്ക് കടത്താൻ ശ്രമിച്ച മൂന്നു ടൺ റേഷനരി പിടികൂടി. സംഭവവുമായി ബന്ധപ്പെട്ട് രണ്ടുപേരെ പോലീസ് കസ്റ്റഡിയിലെടുത്തു. റേഷനരി കടത്താൻ ശ്രമിച്ച വാഹനങ്ങളും പോലീസ് പിടിച്ചെടുത്തു.
കൊല്ലംകോട് സ്വദേശി അജിൻ, ഉച്ചക്കട സ്വദേശി സൈമൺ എന്നിവരാണ് പിടിയിലായത്. ഇവർ വാഹനങ്ങളുടെ ഡ്രൈവർമാരാണ്. സംഭവസ്ഥലത്തു നിന്ന് ഒരാൾ ഓടി രക്ഷപ്പെട്ടു. പുലർച്ചെ രണ്ട് മണിയോടെ പാറശാല പൊലീസ് നടത്തിയ പരിശോധനയിലാണ് അരി പിടികൂടിയത്. തമിഴ്നാട് റേഷൻ കടയിൽ നിന്ന് സംഭരിക്കുന്ന റേഷൻ അരി കളിയിക്കവിള അതിർത്തിയിലെ സ്വകാര്യ ഗോഡൗണുകളിൽ എത്തിച്ച് കേരള വിപണികളിൽ എത്തിക്കുകയാണ് ഇവരുടെ രീതി.
സ്കോർപ്പിയോയിലും പിക്കപ്പിലുമായിരുന്നു അരി കടത്താൻ ശ്രമിച്ചത്. പാറശ്ശാല അതിർത്തിയിൽ അരി കടത്ത് വ്യാപകമാണെന്നും പിടിച്ചെടുത്ത അരി ഇഞ്ചിവിളയിലുള്ള ഗോഡൗണിലേക്ക് കൊണ്ടുപോവുകയായിരുന്നുവെന്നും പാറശ്ശാല പോലീസ് അറിയിച്ചു. പിടിച്ചെടുത്ത അരി സിവിൽ സപ്ലൈസ് കോർപറേഷന് കൈമാറുകയും പ്രതികൾക്കെതിരെ അവശ്യ സാധന നിയമപ്രകാരം കേസെടുക്കുകയും ചെയ്യുമെന്നും പോലീസ് അറിയിച്ചു.
