പാറശാല: കോടതി ഉത്തരവിനെ തുടര്‍ന്ന് വീട് ജപ്തി ചെയ്തതതോടെ കിടപ്പാടം നഷ്ടപ്പെട്ട കുടുംബം പെരുവഴിയില്‍. കൊറ്റാമം പിആര്‍ഡി എസിന് സമീപം റോഡരികത്ത് ജയ്‌സി നിവാസില്‍ ഫ്‌ളോറന്‍സ്(64)ഉം കുടുംബവുമാണ് വഴിയാധാരമായത്.
തമിഴ്‌നാട് സ്വദേശിയുടെ സ്വകാര്യഫൈനാന്‍സില്‍ നിന്ന് രണ്ടായിരത്തില്‍ ഫ്‌ളോറന്‍സിന്റെ ഭര്‍ത്താവ് ജെയിംസ് 1,60,000 രൂപ വാങ്ങി. 5 സെന്റ് വസ്തുവും വീടും ഈടായി നല്‍കി. 2008 വരെ മാസാമാസം 10 ലക്ഷത്തോളം രൂപ പലിശയിനത്തില്‍ നല്‍കിയിരുന്നതായി കുടുംബം പറയുന്നു. 2016ല്‍ ജെയിംസ് മരണപ്പെട്ടു. തുടര്‍ന്നാണ് ഫൈനാന്‍സ് ഉടമ കോടതിയില്‍ കേസ് ഫയല്‍ ചെയ്ത് ജപ്തി നടപടിയിലേക്ക് കടന്നതെന്നാണ് വീട്ടുകാര്‍ ആരോപിക്കുന്നത്.
കോടതി ഉത്തരവ് നടപ്പിലാക്കുന്നതിന്റെ ഭാഗമായി വ്യാഴം വൈകിട്ട് ജീവനക്കാരും പോലീസും വീട്ടില്‍ എത്തിയപ്പോള്‍ വീട്ടമ്മ മണ്ണണ്ണ ഒഴിച്ച് ആത്മഹത്യ ഭീഷണി മുഴക്കിയിരുന്നു .ജപ്തി നടപടിയുമായി ബന്ധപ്പെട്ട് ഒരു നോട്ടീസ് പോലും നല്‍കിയിരുന്നില്ലെന്ന് വീട്ടുകാര്‍ പറയുന്നു. ജപ്തി നടപടിക്കെത്തിയപ്പോള്‍ 20 ലക്ഷത്തോളം രൂപ നല്‍കാമെന്ന് ഫ്‌ളോറന്‍സിന്റെ ബന്ധുക്കള്‍ പറഞ്ഞെങ്കിലും ഫൈനാന്‍സ് ഉടമ അതിന് കൂട്ടാക്കിയില്ലെന്നും ആരോപണ്ടുണ്ട്. തുടര്‍ന്ന് പോലീസ് സംഘം ബലം പ്രയോഗിച്ചാണ് വീട്ടുകാരെ പുറത്തിറക്കിയത്.
പോലീസുകാരുടെ ബലപ്രയോഗത്തില്‍ പരിക്കേറ്റതായി കുടുംബാംഗങ്ങള്‍ പറയുന്നു. കിടപ്പാടം നഷ്ടപ്പെട്ട കുടുംബത്തിന് നീതി ലഭിക്കണമെന്നാണ് നാട്ടുകാരുള്‍പ്പെടെയുള്ളവരുടെ ആവശ്യം. ഹൈക്കോടതിയില്‍ അപ്പീല്‍ നല്‍കുമെന്നും കുടുംബം പറഞ്ഞു.
