ന്യൂദല്‍ഹി : ഓപ്പറേഷന്‍ ഗംഗ ദൗത്യം വഴി ഉക്രൈനില്‍ നിന്നുള്ള മൂന്നാമത്തെ വിമാനം ദല്‍ഹിയിലെത്തി. ബുഡാപെസ്റ്റില്‍ നിന്നുള്ള എയര്‍ ഇന്ത്യ വിമാനമാനെത്തിയത്. ഉക്രൈനില്‍ നിന്നുള്ള 25 മലയാളികളടക്കം 240 പേര്‍ വിമാനത്തിലുള്ളത്. മൂന്ന് ഘട്ടങ്ങളിലായി 750 പേര്‍ ഇപ്പോള്‍ ഇന്ത്യയില്‍ തിരിച്ചെത്തിയിട്ടുണ്ട്. ബാക്കിയുള്ളവരെ ഉടന്‍ മടക്കിക്കൊണ്ടുവരും. ഇതിനുള്ള നടപടികള്‍ നടന്നുവരികയാണ്.
രക്ഷാദൗത്യത്തിലെ രണ്ടാമത്തെ വിമാനം റൊമാനിയയില്‍ നിന്ന് ഇന്ന് പുലര്‍ച്ചെയോടെ ദല്‍ഹിയിലെത്തിയിരുന്നു. അതിനു പിന്നാലെ മൂന്നാമത്തെ വിമാനം കൂടിയെത്തുകയായിരുന്നു. ഇന്ന് രാവിലെ ദല്‍ഹിയിലെത്തിയ രണ്ടാമത്ത സംഘത്തില്‍ 29 മലയാളികള്‍ ഉള്‍പ്പെടുന്ന സംഘമാണ് വിമാനത്തിലുണ്ടായിരുന്നത്. വിമാനത്താവളത്തില്‍ വ്യോമയാന മന്ത്രി ജ്യോതിരാദിത്യ സിന്ധ്യ, വിദേശകാര്യ സഹമന്ത്രി വി മുരളീധരന്‍ എന്നിവര്‍ ചേര്‍ന്നാണ് ഇവരെ സ്വീകരിച്ചത്.
യുക്രൈനില്‍ കുടുങ്ങിയ ഇന്ത്യക്കാരെ നാട്ടിലെത്തിക്കാന്‍ ശനിയാഴ്ചയാണ് കേന്ദ്ര സര്‍ക്കാര്‍ ഓപ്പറേഷന്‍ ഗംഗക്ക് തുടക്കമിട്ടത്. റൊമേനിയയില്‍ നിന്ന് 219 പേരുടെ സംഘത്തെയാണ് ആദ്യം മുംബൈയില്‍ എത്തിച്ചത്. ഈ സംഘത്തില്‍ 27 പേര്‍ മലയാളികളായിരുന്നു.
