ന്യൂദല്‍ഹി: റഷ്യയും ഉക്രെയ്‌നും തമ്മിലുള്ള സംഘര്‍ഷം ഇന്ത്യയെ കൂടുതല്‍ കരുത്തുറ്റതാക്കണമെന്ന സന്ദേശമാണ് നല്‍കുന്നതെന്ന് പ്രധാനമന്ത്രി നരേന്ദ്രമോദി.
ഉത്തര്‍പ്രദേശ് നിയമസഭാ തെരഞ്ഞെടുപ്പിന്റെ ഭാഗമായി ചൊവ്വാഴ്ച ബഹ്‌റൈചില്‍ പ്രസംഗിക്കുകയായിരുന്നു മോദി. ഈ സംഘര്‍ഷത്തിന്റെ സമയത്ത് മനുഷ്യരാശി മുഴുവന്‍ കൂടുതല്‍ കരുത്തരാകണമെന്നും മോദി പറഞ്ഞു.
ലോകത്ത് എത്രമാത്രം സംഘര്‍ഷമാണുള്ളതെന്ന് നിങ്ങള്‍ക്ക് കാണാം. ഇത് ഇന്ത്യയെയും മനുഷ്യരാശിയെയാകമാനവും കരുത്തരാക്കേണ്ട സമയമാണ്. ഇന്ത്യ കരുത്തുറ്റതാക്കാന്‍ യുപിയില്‍ ഓരോ വോട്ടും പ്രയോജനപ്പെടുത്താനും മോദി പറഞ്ഞു.
ഉത്തര്‍പ്രദേശ് ഇപ്പോള്‍ തെരഞ്ഞെടുപ്പിലെ മൂന്ന് ഘട്ടങ്ങള്‍ താണ്ടിക്കഴിഞ്ഞു. ഫിബ്രവരി 10ന് ആദ്യഘട്ടത്തില്‍ 62.4 ശതമാനവും ഫിബ്രവരി 14ന് രണ്ടാം ഘട്ടത്തില്‍ 61 ശതമാനവും ഫിബ്രവരി 20ന് മൂന്നാംഘട്ടത്തില്‍ 60.18 ശതമാനവും വോട്ടിംഗ് രേഖപ്പെടുത്തി. ഇനി ഫിബ്രവരി 23, 27, മാര്‍ച്ച് 3,7 എന്നിവയാണ് അടുത്ത നാല്ഘട്ടങ്ങളിലെ പോളിംഗ് നടക്കും. മാര്‍ച്ച് 10 ന് വോട്ടെണ്ണല്‍ നടക്കും.
