ന്യൂദല്ഹി: റിപ്പബ്ലിക് ദിനാഘോഷങ്ങളുടെ സമാപനത്തിന്റെ ഭാഗമായി നടന്ന ബീറ്റിംഗ് ദി റിട്രീറ്റ് ചടങ്ങ് വര്ണാഭവും താളലയസമന്വയവുമായി. ദല്ഹിയിലെ ചരിത്രപ്രസിദ്ധമായ വിജയ് ചൗക്കില് നടന്ന ബീറ്റിംഗ് ദി റിട്രീറ്റ് രാജ്യത്തിന്റെ സര്വ്വസൈന്യാധിപന് രാഷ്ട്രപതി രാംനാഥ് കൊവിന്ദ്, പ്രധാനമന്ത്രി നരേന്ദ്രമോദി, പ്രതിരോധവകുപ്പ് മന്ത്രി രാജ്നാഥ് സിങ് തുടങ്ങിയ വിശിഷ്ട അതിഥികളുടെ സാന്നിധ്യത്തിലായിരുന്നു.
ഇന്ത്യന് കരസേന, വ്യോമസേന, നാവിക സേന, കേന്ദ്ര സായുധ പോലീസ് സേന എന്നിവയുടെ സംഗീത ബാന്ഡുകള് നേതൃത്വത്തില് 26 പ്രകടനങ്ങളാണ് ഉണ്ടായിരുന്നത്. ഭാരതീയ സംഗീത താളങ്ങള് ഇക്കൊല്ലത്തെ ആഘോഷത്തിന് മികവായി. ആസാദി കാ അമൃത് മഹോത്സവത്തിന്റെ ഭാഗമായി നിരവധി പുതിയ ട്യൂണുകളും ഉള്പ്പെടുത്തിയിരുന്നു. കേരള, ഹിന്ദ് കി സേന, ലതാ മങ്കേഷ്കര് ആലപിച്ച യേ മേരെ വതന് കേ ലോഗോ എന്നിവ ഇതില് ഉള്പ്പെടുന്നു.
ആയിരം ഡ്രോണുകള് പ്രകാശിപ്പിക്കുന്ന ലോകത്തിലെ നാലാമത്തെ രാജ്യം
ന്യൂദല്ഹി: ബീറ്റിംഗ് ദി റിട്രീറ്റ് ചടങ്ങിന്റെ ഭാഗമായി വിജയ് ചൗക്കിന്റെ ആകാശത്ത് ആയിരം ഡ്രോണുകള് ചേര്ന്ന് ഒരുക്കിയത് വര്ണവിസ്മയം. ആസാദി കാ അമൃത് മഹോത്സവത്തിനോടനുബന്ധിച്ച് മേക്ക് ഇന് ഇന്ത്യ പദ്ധതിയുടെ ഭാഗമായാണ് പത്തു മിനിറ്റോളം നീണ്ടു നിന്ന ഡ്രോണ് ഷോ ഒരുക്കിയത്. അശോകചക്രം പതിച്ച ഇന്ത്യയുടെ ഭൂപടത്തോടെയാണ് ഷോ ആരംഭിച്ചത്.
രാഷ്ട്രപിതാവ് മഹാത്മാഗാന്ധി, ദേശീയ യുദ്ധസ്മാരകം, ദേശീയപതാക തുടങ്ങിയ രൂപങ്ങളും ഡ്രോണുകള് ആകാശത്ത് തീര്ത്തു. ഡ്രോണ് പ്രകടനത്തിന് അകമ്പടിയായി പ്രത്യേകം സമന്വയിപ്പിച്ച പശ്ചാത്തലസംഗീതവും ഒരുക്കിയിരുന്നു. ബോട്ലാബ് ഡൈനമിക്സ് എന്ന സ്റ്റാര്ട്ടപ്പ്, ഐഐടി ദല്ഹി, ശാസ്ത്ര സാങ്കേതിക വകുപ്പ് എന്നിവയുടെ പിന്തുണയോടു കൂടിയായിരുന്നു ഡ്രോണ് പ്രദര്ശനം. ബ്രിട്ടണ്, റഷ്യ, ചൈന എന്നീ രാജ്യങ്ങള്ക്കുശേഷം ആയിരം ഡ്രോണുകള് ആകാശത്ത് പ്രകാശിപ്പിക്കുന്ന ലോകത്തിലെ നാലാമത്തെ രാജ്യമായി ഇന്ത്യ മാറിയെന്ന് കേന്ദ്രമന്ത്രി ജിതേന്ദ്രസിങ് അഭിപ്രായപ്പെട്ടു.
ചടങ്ങ് അവസാനിക്കുന്നതിന് മുന്പായി നോര്ത്ത്സൗത്ത് ബ്ലോക്ക് ഭിത്തികളില് നാല് മിനിറ്റ് നേരത്തേക്ക് ഒരു പ്രൊജക്ഷന് മാപ്പിംഗ് പ്രദര്ശനവും സംഘടിപ്പിച്ചിരുന്നു. ഭാരതത്തിന്റെ ചരിത്രവും സംസ്കാരവും വിളിച്ചോതുന്നതായിരുന്നു പ്രൊജക്ഷന് മാപ്പിംഗ്.
