ചെന്നൈ: തമിഴ്നാട്ടിലെ കന്യാകുമാരി ജില്ലയിൽ ഹിന്ദുക്കൾ ന്യൂനപക്ഷമായി മാറിയെന്ന് മദ്രാസ് ഹൈക്കോടതി. 2011ലെ സെൻസസ് കണക്കുകൾക്ക് വിരുദ്ധമാണിതെന്നും ഹൈക്കോടതി നിരീക്ഷിച്ചു. ഹിന്ദു മതവികാരത്തെ വ്രണപ്പെടുത്തുന്ന വിധത്തിൽ വിദ്വേഷ പ്രസംഗം നടത്തിയതിന് തനിക്കെതിരെ ഫയൽ ചെയ്ത കേസ് റദ്ദ് ചെയ്യണമെന്ന് ആവശ്യപ്പെട്ട് ക്രിസ്ത്യൻ പുരോഹിതൻ ഫാ. പി ജോർജ് പൊന്നയ്യ നൽകിയ ഹർജി പരിഗണിക്കവെയാണ് ജസ്റ്റിസ് ജി ആർ സ്വാമിനാഥൻ ഈ നിരീക്ഷണങ്ങൾ നടത്തിയത്.
കന്യാകുമാരി ജില്ലയിൽ മതം അടിസ്ഥാനമാക്കിയുള്ള ജനസംഖ്യയിൽ 1980 മുതൽ വലിയ മാറ്റങ്ങൾ പ്രകടമാണ്. ഹർജിക്കാരൻ തന്റെ പ്രസംഗത്തിൽ കന്യാകുമാരി ജില്ലയിലെ ക്രിസ്ത്യൻ ജനസംഖ്യ 62 ശതമാനം കടന്നതായി പരാമർശിച്ചിട്ടുണ്ടെന്ന് കോടതി നിരീക്ഷിച്ചു. വൈകാതെ ക്രിസ്ത്യൻ ജനസംഖ്യ 72 ശതമാനം കടക്കുമെന്നും അദ്ദേഹം പറയുന്നു. ഹിന്ദുക്കൾക്ക് താൻ മുന്നറിയിപ്പ് നൽകുകയാണെന്നും തങ്ങളുടെ വളർച്ച തടയാൻ ആർക്കും കഴിയില്ലെന്നും പറയുന്നതിൽ ഹർജിക്കാരനുള്ള ആത്മവിശ്വാസം വ്യക്തമാണെന്നും കോടതി പറഞ്ഞു.
ഹിന്ദുക്കളിലെ പട്ടികജാതി വിഭാഗങ്ങളിൽപ്പെടുന്ന വലിയൊരു വിഭാഗം ജനങ്ങൾ ക്രിസ്തുമതം സ്വീകരിച്ചിട്ടുണ്ടെങ്കിലും സംവരണാനുകൂല്യങ്ങൾ ലഭിക്കുന്നതിനായി രേഖകളിൽ അവർ ഹിന്ദുക്കളായി തുടരുകയാണെന്നും ഈ വസ്തുത സെൻസസ് കണക്കിലെടുക്കുന്നില്ലെന്നും കോടതി പറഞ്ഞു. അത്തരത്തിലുള്ളവരെ ക്രിപ്റ്റോ ക്രിസ്ത്യാനികൾ എന്നാണ് വിളിക്കുന്നതെന്നും കോടതി കൂട്ടിച്ചേർത്തു.
“ഈ പ്രമേയത്തെ അടിസ്ഥാനമാക്കി ഒരു ചലച്ചിത്രം പോലും ഉണ്ടായിരുന്നു (രുദ്ര താണ്ഡവം). അത്തരമൊരു വിഭാഗത്തിൽ പെട്ട ഒരു ജഡ്ജിയുടെ പദവിയെ ചോദ്യം ചെയ്ത് ഒരു റിട്ട് ഹർജി പോലും ഉണ്ടായിരുന്നു. എല്ലാവരും സത്യം അറിയാത്ത പോലെ അഭിനയിച്ചു. എന്നാൽ അദ്ദേഹം മരിച്ചപ്പോൾ ക്രിസ്ത്യൻ ആചാരപ്രകാരം സെമിത്തേരിയിൽ സംസ്കരിച്ചു,” ഉത്തരവിൽ പറയുന്നു.
കന്യാകുമാരി ജില്ലയിലെ അരുമനൈ എന്ന ഗ്രാമത്തിൽ വെച്ചാണ് ഫാദർ പൊന്നയ്യ കേസിനാസ്പദമായ വിദ്വേഷ പ്രസംഗം നടത്തിയത്. മതപരിവർത്തനം ഒരു ഗ്രൂപ്പിന്റെ അജണ്ടയായി മാറാൻ പാടില്ലെന്നും ജഡ്ജി പറഞ്ഞു. ഇന്ത്യൻ ശിക്ഷാ നിയമത്തിലെ വകുപ്പുകൾ 153എ, 295എ എന്നിവ പ്രകാരം ഹർജിക്കാരനെതിരെ ചുമത്തിയ കേസുകൾ റദ്ദാക്കാൻ ഹൈക്കോടതി വിസമ്മതിച്ചു.
