ആലപ്പുഴ: അഡ്വ. രണ്‍ജീത് ശ്രീനിവാസന്റെ കൊലയാളികളായ പോപ്പുലര്‍ഫ്രണ്ടുകാര്‍ക്ക് വ്യാജരേഖ ചമച്ച് സിം കാര്‍ഡുകള്‍ സംഘടിപ്പിച്ചു നല്‍കിയത് എസ്ഡിപിഐ ഗ്രാമപഞ്ചായത്തംഗം. പുന്നപ്ര തെക്ക് ഗ്രാമപഞ്ചായത്ത് പന്ത്രണ്ടാം വാര്‍ഡ് പ്രതിനിധി സുള്‍ഫിക്കറാണ് കൊലയാളി സംഘത്തിന് സിമ്മുകള്‍ നല്‍കിയതെന്നാണ് വിവരം.
കഴിഞ്ഞ ദിവസം പോലീസ് സ്റ്റേഷനിലേക്ക് ഇയാളെ വിളിച്ചുവരുത്തിയെങ്കിലും തന്ത്രപൂര്‍വം കടന്നുകളയുകയായിരുന്നു. പുന്നപ്ര സ്വദേശിനിയായ വീട്ടമ്മ വത്സലയുടെ തിരിച്ചറിയല്‍ രേഖകള്‍ ഉപയോഗിച്ചാണ് മൊബൈല്‍ ഷോപ്പുടമ വ്യാജ സിമ്മുകള്‍ കരസ്ഥമാക്കിയത്. ഇത്തരത്തില്‍ സംഘടിപ്പിച്ച സിമ്മുകള്‍ സുള്‍ഫിക്കറിനാണ് നല്‍കിയതെന്ന് കടയുടമ അറിയിച്ചതായി വത്സല പറഞ്ഞു. ഇതു സംബന്ധിച്ച് അന്വേഷണം നടത്തുമെന്ന് പോലീസ് വ്യക്തമാക്കി
പുന്നപ്ര കളിത്തട്ടിനു സമീപം ബി ആന്‍ഡ് ബി മൊബൈല്‍ ഷോപ്പ് നടത്തുന്ന മുഹമ്മദ് ബാദുഷയാണ് വത്സലയുടെ ആധാര്‍ രേഖകള്‍ ഉപയോഗിച്ച് മതഭീകരര്‍ക്ക് സിമ്മുകള്‍ സംഘടിപ്പിച്ചത്. വത്സല സിം കാര്‍ഡ് എടുക്കാന്‍ ചെന്നപ്പോള്‍ ആധാറിന്റെ പകര്‍പ്പ് നല്‍കിയിരുന്നു. കൂടാതെ രണ്ടു തവണ ഫോട്ടോ എടുക്കുകയും ചെയ്തിരുന്നു. പിന്നീട് ഒരു സിം വത്സലയ്‌ക്ക് നല്‍കി. രണ്‍ജീതിന്റെ കൊലയാളി സംഘം ഉപയോഗിച്ചത് വത്സലയുടെ പേരിലെടുത്ത സിം കാര്‍ഡാണെന്ന് പോലീസ് അറിയിച്ചപ്പോഴാണ് തന്നെ കബളിപ്പിച്ച് സിം കാര്‍ഡുകള്‍ കടയുടമ എടുത്ത വിവരം ഇവര്‍ അറിയുന്നത്.
സിം കാര്‍ഡുകള്‍ എടുക്കാന്‍ ഫോട്ടോയും തിരിച്ചറിയല്‍ രേഖകളും മൊബൈല്‍ഷോപ്പുകള്‍ക്ക് നല്‍കുന്നത് സുരക്ഷിതമല്ലെന്ന് ഈ സംഭവം വ്യക്തമാക്കുന്നു. നേരത്തെ തന്നെ ഇത്തരത്തില്‍ പലരും സിമ്മുകള്‍ കരസ്ഥമാക്കി ദുരുപയോഗം ചെയ്യുന്നതായി വാര്‍ത്തകളുണ്ടായിരുന്നു. കടയില്‍ റീ ചാര്‍ജ് ചെയ്യാന്‍ നല്‍കുന്ന നമ്പര്‍ ലൗ ജിഹാദികള്‍ക്ക് നല്‍കി പെണ്‍കുട്ടികളെ കെണിയില്‍പ്പെടുത്തുന്നതായും ആക്ഷേപം ഉയര്‍ന്നിരുന്നു.
