ആലപ്പുഴ : ബിജെപി നേതാവ് രണ്‍ജീത്ത് ശ്രീനിവാസന വെട്ടിക്കൊലപ്പെടുത്തിയ കേസില്‍ മൂന്ന് എസ്ഡിപിഐ പ്രര്‍ത്തകര്‍ പിടിയില്‍. ഇവരില്‍ രണ്ട് പേര്‍ക്ക് കേസില്‍ നേരിട്ട് പങ്കാളിത്തമുള്ളതായാണ് അന്വേഷണ സംഘത്തിന്റെ കണ്ടെത്തല്‍. ഇവരുടെ അറസ്റ്റ് ഇന്ന് രേഖപ്പെടുത്തിയേക്കും. ഇക്കാര്യത്തില്‍ പോലീസ് ഔദ്യോഗികമായ സ്ഥിരീകരണം നല്‍കിയിട്ടില്ല.
കഴിഞ്ഞ ദിവസങ്ങളിലായിട്ടാണ് മൂന്ന് പേരെ കസ്റ്റഡിയിലെടുത്തത്. ഒരാളെ ബെംഗളൂരുവില്‍ വെച്ചാണ് കസ്റ്റഡിയിലെടുത്തത് എന്നാണ് പോലീസില്‍ നിന്ന് ലഭിക്കുന്ന വിവരം. അനൂപ്, അഷ്റഫ് എന്നിങ്ങനെ പേരുള്ള കൃത്യത്തില്‍ പങ്കെടുത്ത രണ്ടുപേരുടെ അറസ്റ്റാകും ഇന്ന് രേഖപ്പെടുത്തുക.
12 പേര്‍ക്കാണ് കൊലപാതകവുമായി നേരിട്ട് ബന്ധമുള്ളതെന്നാണ് വിലയിരുത്തല്‍. പ്രതികള്‍ സംസ്ഥാനം വിട്ടതായാണ് അന്വേഷണ സംഘത്തിന്റെ നിഗമനം. ഇവര്‍ക്കായി കര്‍ണ്ണാടകത്തിലേക്കും അന്വേഷണം വ്യാപിപ്പിച്ചിട്ടുണ്ട്. കര്‍ണ്ണാടകത്തിലെ പോപ്പുലര്‍ ഫ്രണ്ട് സംഘാംഗങ്ങളെ കേന്ദ്രീകരിച്ചാണ് അന്വേഷണം.
പ്രതികള്‍ മൊബൈല്‍ ഫോണ്‍ ഉപയോഗിക്കുന്നില്ല. അതിനാല്‍ പുറത്തു നിന്നും ഇവര്‍ക്ക് സഹായം ലഭിച്ചിട്ടുണ്ടെന്നാണ് വിലയിരുത്തല്‍. പിടിയിലായവരില്‍ നിന്ന് ലഭിക്കുന്ന വിവരങ്ങള്‍ വഴി മറ്റുള്ള പ്രതികളെ കണ്ടെത്താനാകുമെന്ന പ്രതീക്ഷയിലാണ് പോലീസ്. കേസിനെ ബാധിക്കുമെന്നതിനാല്‍ വിശദാംശം ഇപ്പോള്‍ പുറത്തുവിടാനാകില്ലെന്നാണ് പോലീസിന്റെ നിലപാട്.
